Kinompirmar ni Senate President Pro Tempore Panfilo "Ping" idi Huebes, Sept 18, a ₱600 a milion, a di naiprograma a badiet, ti nailatang para kadagiti flood control project iti Bulacan iti 2023 .
Kinuna ni Lacson, daulo ti Senate Blue Ribbon Committee a mangim-imbestigar kadagiti naanomalia a flood control project, a naibilang daytoy iti babaen dagiti di naiprograma a pondo nga addaan kadagiti nailista a proyekto a nailista a ₱75 milion ti tunggal maysa.
Pimmada daytoy a gatad iti nakamat ni Assistant Engineer ti Department of Public Works and Highways (DPWH) ni Brice Ericson Hernandez iti testimoniana, nga immunan nga impalgakna iti panagimbestigar ti House Infrastructure Committee (Infra Comm).
Kinuna ni Hernandez, iti infra comm, nga idi 2023, nangi-release ni Senador Joel Villanueva iti ₱600 a milion, ken ti "SOP "daytoy a gatad ket 30 a porsiento met. "SOP” wenno standard operating procedure ti mayaw-awag para kadagiti komision wenno kickback.
DOH, namakdaar iti posible a pannakadangran iti Traslacion
Kinuna ni Lacson a masapul a tamingenda daytoy iti sumaruno a hearing ti Blue Ribbon.
Segun met ken ni Bulacan First District Engineer Jaypee Mendoza, nagkiddaw ni Villanueva iti ₱1.5 a billion manipud ken ni dati a daulo ti DPWH Bulacan First District Engineering Office Henry Alcantara para iti maysa a multi-purpose building.
Impakita ni Hernandez bayat ti infra comm hearing dagiti ladawan ti maysa a saritaan iti Viber app a mapapati a nangiraman ken ni Villanueva kadagiti naaanomalia a flood control project. Kinunana a dagitoy ket ladawan ti Viber Messages a nai-pre-set nga agpukaw kalpasan ti sumagmamano a segundo, ket saan a mabalin nga i-screenshot dagitoy.
Ti met depensa ni Alcantara, ti conversation ket maipapan iti panag-follow up ni Villanueva iti kiddaw a multi-purpose a pasdek. Kinompirmar met daytoy ni Mendoza.
"'No agpal-follow up ni Senador Joel, agpayso met a ti irek-request-na ket multi-purpose building, ngem kadagita a panawen, saan(mi) a kabaelan ti dawdawaten ni Senador Joel," kinuna ni Mendoza.
Kinunana pay a segun iti sekretario ti DPWH idi a ni Manuel Bonoan, ₱600 a milion laeng ti maitedda.
"Napanunot ni DE Henry nga i-convert iti flood control 'diay ₱600-milion, a naalaan dagiti kontraktor iti 25-porsiento tapno ti madagup ket ₱150-milion," inlawlawag ni Mendoza. (Dhel Nazario/MANILA BULLETIN)
