Binabalaw ni dati a gobernador ti Ilocos Sur Luis "Chavit" Singson ti pamilia a Marcos ken ti segun kenkuana ket namimpinsanen a pannakapukaw ti “Solid North.”
Iti maysa a press conference ita a Biernes, Setiembre 19, napinget nga impaganetget ni Singson nga awanen ti makunkuna a "Solid North" wenno ti sibubukel o a suporta dagiti taga-Norte iti pamilia a Marcos.
Dinillawna met ti kunana a kasla a saan a panagdur-as ti Ilocos Norte, a baluarte dagiti Marcos, no ikomparar iti Ilocos Sur a teritorio met dagiti Singson.
“Apay a ti Ilocos Sur, from the poorest to the 5th riches in the country? Apay a ti Ilocos Norte, adda pay la iti baba?” kinuna ni Singson.
Mapukpukaw a nobia, nasarakan iti Pangasinan
“Masirib dagiti tattao, uray bayadam ida, saandakan nga ibotos," innayonna.
Malagip nga idi Hulio 2025, binabalaw ni Singson ni Presidente Ferdinand “Bongbong” Marcos Jr., a kinunana a kas man addan Alzheimer’s Disease (wenno mananglilipaten) daytoy.
“Kalpasan ti eleksion, addan Alzheimer’s ni Bongbong, saannakon nga am-ammo... Daytoy siguron ti maudi a panangsuportarmi kadagiti Marcos agsipud ta didakamin metten am-ammo," kinuna ni Singson.
Iti agdama, dua a Marcos ti agturturay kadagiti dua a distrito ti Ilocos Norte, da Ilocos Norte 1st district Rep. Sandro Marcos, anak ni Presdiente Marcos; ken Ilocos Norte 2nd district Rep. Angelo Marcos Barba, anak ti buridek a kabsat ni dati a presidente Ferdinand Marcos, Sr.
Bin-ig met a Marcos ti agturay iti probinsia a da Gobernador Cecilia Araneta Marcos nga asawa ni dati a gobernador ti Ilocos Norte Mariano Marcos II a kaanakan ni dati a presidente Marcos Sr., idinto a ti met anak ni Sen. Imee Marcos a ni Matthew Manotoc ti agdama a bise gobernador. (Kate Garcia/BALITA)
