Pimmigsa bassit ni Bagyo Nando (international name: Ragasa) ita nga aldaw, Septiembre 19, ket agtultuloy nga agpalaud amianan a laud iti Philippine Sea iti kapardas a 15 a kilometro kada oras, segun iti Philippine Atmospheric, Geophysical and Astronomical Services Administration (PAGASA).
Iti waragawag ti PAGASA itay 5:00 iti parbangon, nasaripatpatanda ni Nando iti 1,075 a kilometro iti daya ti Central Luzon.
Agpigsa ni Nando iti 75 a kilometro kada oras iti asideg ti sentrona, ken addaan iti pugso a 90 a kilometro kada oras.
Segun iti PAGASA, awan ti naibayog a Tropical Cyclone Wind Signals (TCWS), ngem mabalin a maipan iti Signal No. 1 ti Northern Luzon inton Sabado, Septiembre 20.
Retirado a heneral, nakemmeg gapu iti panangsugsog a mangtippuog iti gobierno
Impakdaar pay ti PAGASA a mabalin a maingato agingga iti Signal No. 5 ti pakdaar, no agbalin a super typhoon ni Nando.
Pattapattaen ti PAGASA a mabalin a labsan wenno agdisso ni Nando iti Babuyan Islands iti baet ti Lunes (Septiembre 22) iti rabii, ken agsapa ti Martes (Septiembre 23), sakbay a rummuar daytoy iti Philippine Area of Responsibility (PAR). (Merlina Hernando-Malipot/Manila Bulletin//Lito Hilidon//Bannawag)
