Saan pay a nakalisi da Senador Jinggoy Estrada ken Joel Villanueva manipud iti isyu ti ginasgasut a milion a pisos a mapapati nga insingitda iti budget iti General Appropriations Act (GAA) idi 2023 ken iti 2025.
Daytoy ti imbatad ni Senate President Pro Tempore Panfilo “Ping” Lacson idi Septiembre 18, kalpasan ti naangay a public hearing iti anomalia dagiti flood control project.
Segun ken ni Lacson, nupay "napilpili laeng ti nalagip" ni dati nga assistant district engineer Brice Hernandez, saan pay ida a nailisi iti isyu nupay napalubosanda a nangsango iti nangakusar kadakuada.
Kinuna ni Lacson a saan pay a nailisi da Villanueva ken Estrada iti isyu ti panangisingit kadagiti infrastructure project iti Bulacan iti budget nga aggatad iti ₱600 a milion (Villanueva) ken ₱300 a milion (Estrada), kas imbutaktak ni Hernandez.
Kasapulan ti natibker ken nainkalintegan a pagtaktakderan iti parikut iti WPS --NMC
Iti kaudian a hearing ti Blue Ribbon Committee, impalgak ni Lacson a ti ₱600-milion a para iti flood control project iti Bulacan ket nasarakanda iti Unprogrammed Fund ti 2023 GAA, a segun ken ni Hernandez ket kukua ni Villanueva. Ngem inlibak ni Villanueva daytoy.
Kinuna pay ni Lacson a natakuatan ti opisinana ti ₱355 a milion iti regular budget ti 2025 GAA para iti infrastructure project iti Bulacan, a segun ken ni Hernandez, ket kukua ni Estrada. Ngem inlibak met ni Estrada daytoy.
Innayon ni Lacson a pinalubosanna dagiti dua a sendaor a makipaset iti hearing ta kalintegan ti asino man a tao, senador man wenno kadawyan nga umili, a mangsango iti mangak-akusar kenkuana. (Hannah L. Torregoza/Manila Bulletin//Lito Hilidon/Bannawag)
