Sisasagana ti Philippine National Police (PNP) a mangipaay iti taoda para iti seguridad a kasapulan ti Independent Commission for Infrastructure (ICI), ita a rugiandan nga imbestigaren dagiti anomalia iti flood control project ti Department of Public Works and Highways (DPWH).
Daytoy ti waragawag ni Acting PNP Chief, Police Lt. Gen. Jose Melencio Nartatez Jr. ita nga aldaw, Septiembre 19, ta ammoda a kasapulan a masigurado ti kinatalged ti komite nga agimbestigar, tapno matakuatan ti kinapudno kadagiti flood control project iti pagilian.
Binuangay ni Presidente Ferdinand Marcos Jr. ti ICI kalpasan ti panangibutaktakna nga adda ghost projects ken substandard flood control projects iti maikapat nga State of the Nation Address (SONA)-na idi Hulio.
Rinugian ti ICI ti nagimbestigar babaen ti panangiwayatda iti inspeksion iti Quezon City ken panangipaulogda iti summons iti maysa kadagiti naikkat nga opisial ti DPWH Bulacan 1st Engineering District.
Marcos, Robredo, nagsarak iti Naga city
Agpaay a daulo ti ICI ni Supreme Court Associate Justice Andres Reyes Jr., ken agpaay a kameng da dati a sekretario ti DPWH Rogelio Singson, ken SGV & Co. country managing partner Rossana Fajardo. Ni retirado a PNP major general Benjamin Magalong, a mayor ti Baguio City, ti agpaay kas adviser. (Martin Sadongdong/Manila Bulletin//Lito Hilidon/Bannawag)
