Pormal a winaswas ni House Speaker Faustino “Bojie” Dy III ti travel clearance ni Ako Bicol Party-list Rep. Zaldy Co ket imbilinna nga agsubli daytoy iti Filipinas iti uneg ti 10 nga aldaw.
Ingganetget ti baro a lider ti Kamara a "kasapulan ti nadagdagus a kaadda ni Co."
Iti mays a surat a napetsaan iti Septiembre 18, 2025, impakaammo ni Dy ken ni Co: "ti agdama a travel clearance-mo para iti personal a panagbiahem ket mawaswas, epektipo itan a dagus."
"Naipaulog daytoy a pannakawaswas maigapu iti napateg unay nga interes ti publiko ken gapu iti kaadda dagiti nasken a mataming a dagus a nailian a pakaseknan a kasapulan ti pisikal a kaaddam,” innayon ti surat.
DOH, namakdaar iti posible a pannakadangran iti Traslacion
Kinuna ti Speaker, a mangibagi iti Isabela 6th district, a “gapu ta kalikaguman ti serbisio, maibilin ti panagsublim iti Filipinas iti uneg ti sangapulo (10) nga aldaw ti kalendario manipud pannakaawatmo iti daytoy a pakaammo."
Ni Co ti chairman ti Committee on Appropriations iti napalabas a maika-19 a Kongreso. Mapapati napnapno iti "insertions" ti nasional a badiet bayat ti maudi a tawen ti maika-19 a Kongreso--ti ₱6.352-trillion a 2025 General Appropriations Act (GAA).
Kinuna ni Ako Bicol Party-list Rep. Alfredo Garbin Jr. idi napan a lawas nga adda sakit ti puso ni Co ken agpapaagas daytoy iti Estados Unidos. (Ellson Quismorio/MANILA BULLETIN)
