Inwaragawag ni Presidente Ferdinand Marcos Jr. ita nga aldaw, Septiembre 20, nga isubli ti gobierno ti ₱60 a bilion iti Philippine Health Insurance Corporation (PhilHealth), ket impasiguradona iti publiko a mausar ti pondo iti panangpasaknap iti serbisio ken mangpasayaat iti trabaho ti PhilHealth iti pagilian.
Iti pananginspeksion ni Presidente Marcos Jr. iti Dr. Jose Fabella Memorial Hospital mainaig iti Zero Balance Billing program, kunana a maawatanna ti rikna ti publiko iti panangyallatiw ti Department of Finance (DOF) iti di nausar a pondo ti PhilHealth iti national government.
Segun ken ni Marcos, nupay napaneknekandan a saan a maksayan ti serbisio nga ipapaay ti PHilHealth, adda latta rumsua a panagdanag.
Impaganetget ni Marcos maisublin ti pondo iti PhilHealth idinto nga adda pondo a saan a nausar a naggapu iti dadduma nga ahensia kas iti Department of Public Works and Highways (DPWH).
Mapukpukaw a nobia, nasarakan iti Pangasinan
Maitunos daytoy iti programa ti administrasion a mangpapigsa iti sistema ti pannakatagiben ti salun-at iti pagilian.
Kuna ni Marcos a saan laeng a simboliko daytoy a tignay, no di ket maysa nga addang tapno masigurado nga amin a Filipino ket maipaayan iti serbisio medikal.
Dinakamat ni Marcos ti Zero Balance Billing program kas maysa a pammaneknek iti pannakarepormar iti sistema ti pannakatagiben ti salun-at a maipaay ken magun-odan ti amin. (Argyll Cyrus Geducos/Manila Bulletin//Lito Hilidon/Bannawag)
