Agtultuloy a pumigsa ni Bagyo Nando (international name: Ragasa) bayat ti panagtignay daytoy iti amianan a laud ti Philippine Sea, segun iti Philippine Atmospheric, Geophysical and Astronomical Services Administration (PAGASA) ita nga aldaw, Septiembre 20.
Kuna ni PAGASA weather specialist Grace Castañeda a maekspektar nga umasideg ni Nando iti Batanes-Babuyan Islands inton Lunes, Septiembre 22, iti malem wenno rabii, ket posible nga agbalin a super typhoon sakbay nga agdisso iti daga.
Itay 4:00 iti parbangon, nasaripatpatan ti PAGASA ti sentro ni Nando iti 780 a kilometro iti daya ti Casiguran, Aurora, nga agpaamianan a laud iti kapardas a 10 a kilometro kada oras.
Agpigsa ni Nando a 100 a kilometro kada oras iti asideg ti sentrona, ken addaan pugso nga agingga iti 125 a kilometro kada oras.
Retirado a heneral, nakemmeg gapu iti panangsugsog a mangtippuog iti gobierno
Segun ken ni Castañeda, nalawa ti sakupen ni Bagyo Nando, ta nupay adda daytoy iti murdong ti Northern Luzon, makarikna latta iti napigsa nga angin ken bayakabak ti entero a Northern Luzon ken dagiti adda iti Central Luzon.
Segun iti PAGASA, nupay awan pay ti naibayog a pakdaar ti bagyo, papigsaen ni Nando ti abagat (southwest monsoon) a mangyeg iti napigsa nga angin ken bayakabak iti northern ken central Luzon, paset ti Visayas, ken Mindanao.
Innayon ti PAGASA a mabalin a rummuar ni Nando iti Philippine Area of Responsibility (PAR) inton Martes, Septiembre 23. (Merlina Hernando-Malipot/Manila Bulletin//Lito Hilidon/Bannawag)
