Masapul a laksiden dagiti ahensia ti gobierno ti "greenwashing attempts" wenno panaggandat dagiti kompania ti tabako ken dadduma pay nga industria a panangliklik iti makapadakes nga epekto dagiti produktoda a mangdangran iti salun-at, kinuna ti public health advocacy group a HealthJustice Philippines idi Sept. 20, bayat ti pannakarambak ti International Coastal Cleanup Day.
Maibatay kadagiti panagadal, di kumurang nga 4.5 trilion a rungrong ti sigarilio ti maibelbelleng iti kada tawen, a mamagbalin itoy a kaaaduan a kita ti plastik a basura iti lubong a mangigamgamer iti makasabidong a kemikal iti daga ken dalanan ti dandanum.
Iti maysa nga statement, kinuna ti presidente ti HealthJustice Philippines a ni Mary Ann Mendoza a ti industria ti tabako ket saan la a mamagpeggad iti biag ti publiko, no di ket dadaelenna ti aglawlaw.
Marcos, Robredo, nagsarak iti Naga city
“Madangran nga agpadpada dagiti ecosystem iti danum ken iti daga, pangta iti pannakagun-od iti nadalus a danum, mangtignay iti di mataginayon a panagkonsumo, ken pakaruenna dagiti epekto ti klima, a mamagbalin itoy a nalawag a di maitunos kadagiti Sustainable Development Goals,” kinuna ni Mendoza, ket indagadagna iti sibubukel a gobierno a “agkedked iti ania man a pannakilangen iti industria, ta ti kasta a pannakiraman ket maikontra iti mandatoda a mangsalaknib iti aglawlaw..”
Ti industria ti tabako, segun iti grupo a mangitantandudo iti salun-at, ket addaan iti pakasaritaan ti panagpammarang a kas aktibidad ti corporate social responsibility a kas iti panagmula iti kayo, panagdonasion, ken panagdaldalus tapno mangpataud iti inuulbod nga imahe ti panangaywan iti aglawlaw ken mangiparang iti bagina a kas man “good corporate citizen."
Impaganetget ni Mendoza a ti kasta a greenwashing dagiti kompania ket “saan a mabalin a maibilang kas pudno nga aramid ti nainkagimongan a responsabilidad, ta dagiti produkto ti tabako ket nakaro a makadangran ken awan ti ipaayda a pakabenepisiaran ti kagimongan.”
“Kastoy met laeng kadagiti dadduma pay nga industria a makadangran iti salun-at, kas kadagiti agpatpataud iti ultra-processed food, nga aglemlemmeng iti likudan ti nasayaat a PR iti laksid dagiti negatibo nga epektoda iti salun-at ken aglawlaw,” innayonna.
Segun iti Artikulo 5.3 ti WHO Framework Convention on Tobacco Control (FCTC), mamandaran dagiti gobierno a mangsalaknib kadagiti pagalagadan ti salun-at ti publiko manipud iti impluensia ti industria ti tabako, a pakairamanan ti “denormalizing” kadagiti aktibidadna iti corporate social responsibility.
Iti Filipinas, ipatpatalged daytoy ti Civil Service Commission–Department of Health Joint Memorandum Circular No. 2010-01, a manglapped kadagiti opisial ken empleado ti gobierno a makilangen iti industria ti tabako malaksid no nainget a kasapulan para iti regulasion. (Jel Santos/MB)
