Sisasaganan ti Philippine National Police (PNP) nga agbantay iti dua a rali kontra iti panagkunniber a maangay iti Luneta Park, Manila ken iti People Power Monument iti Quezon City inton Domingo, Septiembre 21, a manamnama a dar-ayan ti rinibu a tattao a mangipeksa iti panangsupiatda iti nasaknap a panagkunniber kadagiti naanomalia a flood control project.
Dinagadag ni acting PNP chief Lt. Gen. Jose Melencio Nartatez, Jr. dagiti nangorganisar iti rali a tumulongda koma iti panagbalin a natalinaay ken naurnos dagiti dua a rali.
Maangay dagiti rali, a maigiddan iti anibersario ti pannakaideklarar ti Martial Law, gapu iti pannakaiparangarang ti dakkel a panagkunniber kadagiti flood control project, a segun kadagiti autordad, ket mabalin nga agdagup iti trilion a pisos kadagiti napalpalabas a tawen.
Segun ken ni Nartatez, matarusan ti PNP ti luksaw ken panagsapul dagiti agrali iti pannakadusa dagiti nagbasol.
Retirado a heneral, nakemmeg gapu iti panangsugsog a mangtippuog iti gobierno
"Saanyo a kabusor ti polisia, ngem adda annongen a rebbengmi nga ipatungpal -- ti panangsigurado a natalged ti tunggal maysa. Agtitinnulong ken agririnnaemtayo," kuna ni Nartatez.
Segun kadagiti nangorganisar, mapan a 30,000 a tattao ti manamnama a tumabuno iti 'Trillion Peso March' iti People Power Monument, idinto a rinibu met ti makipaset iti “Baha sa Luneta” rally.
Agarup 50,000 a polis ti maibaon, saan laeng a tapno agbantay iti kinatalged ti rali, no di ket tapno mangipatungpal ti talna ken urnos iti Metro Manila, ken iti dadduma pay a lugar a pakaangayan dagiti rali. (Aaron Recuenco/Manila Bulletin//Lito Hilidon/Bannawag)
