Kayat ni dati a kongresman ken gobernador ti Ilocos Sur Luis "Chavit" Singson a maiwayat ti imbestigasion kadagiti flood control project iti mismo nga Ilocos Norte a teritorio ni Presidente Marcos Jr., a naipadamag a nakaalaan dagiti Discaya iti adu a kontrata.
Nupay saanen nga agtakem iti opisina a publiko, nangangay ni Singson iti press conference idi Biernes, Sept. 19, tapno yebkasna ti pannakaupayna iti panangim-imbestigar ti gobierno iti kontrobersia.
Kaaliado ni Marcos ni Singson iti politika ngem nagkontrada idi mapapati a nagkedked ni Marcos nga ikkan ni Singson iti posision iti gobierno
Nupay dinayawna ti pannakabukel ti Independent Commission for Infrastructure (ICI), kasla saan a napnek ni Chavit iti bukod a panagimbestigar ti Senado iti eskandalo ti panagkunniber.
Senado, pinasingkedanna ti ₱6.793-trilion a nailian a badiet para 2026
Kunana a nagbalin a sirkus ti panagimbestigar ti Senado.
“Kasla loklokuendatayo laengen ket. Rebbengna a ti umuna a maimbestigar, no flood control, unaenda ti Region 1, Ilocos Norte," kinunana.
Dinakamat ni Singson, a maysa a business magnate dagiti kabagianna ket kontraktor met laeng, ti report nga adu a flood control project iti Ilocos Norte ti naited kadagiti kompania ti kontrobersial nga agassawa a Curlee ken Sarah Discaya.
“Adda ₱10-bilion a flood control project iti Ilocos Norte iti panawen ni Presidente BBM. Asino ti nakontrata para kadagiti proyekto? Dagiti Discaya,” kinunana.
“Discaya met laeng dagiti kontraktorda iti Ilocos Norte. Kasano koma ngarud a mamatitayo iti gobierno?" innayonna.
Binabalaw pay ni Singson ni Marcos gapu ta saanna a mapasardeng ti panagkunniber apaman a nagtugaw a kas presidente.
“Idi pay la katugtugawna, impasardengnan, no addaan isuna iti delikadesa," kinunana.
Innayonna a pagaammo ni Marcos no ania ti mapaspasamak uray iti kababaan a tukad ti gobierno, agsipud ta isu ngarud ti presidente. (Joseph Pedrajas /MB)
