Impakaammo ti Manila Police District (MPD) a nakemmeg ti 72 a tattao kalpasan ti nariribuk a panangduprak kadagiti naka-deploy a polis bayat ti pannakaisayangkat dagiti protesta kontra iti panagkunniber iti nadumaduma a paset ti Manila idi Domingo, Septiembre 21.
Iti report-na ken ni Manila City Mayor Francisco "Isko Moreno" Domagoso, kinuna ni MPD Chief Brig. Gen. Arnold Abad a nagbalin a bayolente dagiti nakamaskara a demonstrador iti Luneta Park, Ayala Bridge, ken Mendiola babaen ti panangkugtar, panangiduron, ken pananguborda iti bato, botelia, barikada, ken nabangsit a likido nga adda laokna a pintura kadagiti polis.
"Kadagiti nakemmeg, 51 ti naarestar iti Ayala Bridge, a pakairamanan ti 38 a nataengan, a naipasiong iti physical examination; 2 a menor de edad, naipan iti Reception and Action Center (RAC) ti Manila Department of Social Welfare (MDSW), ken 11 a menor de edad a madama pay laeng a maim-imbestigar. Sabali pay a 21 ti naarestar iti Mendiola, a buklen ti 14 a nataengan ken 7 a menor de edad," kinuna ni Abad.
Agtalinaed dagiti amin a nakemmeg iti kustodia ti MPD iti babaen ti District Investigation and Detective Management Division (DIMDD) ken Women and Children Protection Section (WCPS). Maidarum dagitoy iti malicious mischief, panaglabsing iti Anti-Barricade Act, ken dadduma pay a mainaig a naglabsingan. (Patrick Garcia/MB)
