Pumigpigsa ni Super Typhoon Nando (international name: Ragasa) ita nga aldaw, Septiembre 22, bayat nga umas-asideg iti Babuyan Islands, a mabalin a labsanna wenno agdisso sadiay inton tumengnga ti aldaw, segun iti Philippine Atmospheric, Geophysical and Astronomical Services Administration (PAGASA).
Itay 7:00 ti agsapa, nasaripatpatan ti PAGASA ti mata ni Nando iti 180 a kilometro iti daya ti Calayan, Cagayan, segun iti datos ti Aparri Doppler Weather Radar.
Agpigsa ni Nando iti 215 a kilometro kada oras iti asideg ti sentrona ken pugso nga agingga iti 265 a kilometro kada oras.
Naipan iti Signal No. 5 ti amianan ken sentro a paset ti Babuyan Islands (Babuyan, Didicas, Panuitan, Calayan, Dalupri, Irao, Camiguin, ken Pamuktan).
Senado, pinasingkedanna ti ₱6.793-trilion a nailian a badiet para 2026
Adda iti Signal No. 4 ti abagatan a daya ti Batanes (Basco, Mahatao, Ivana, Uyugan, and Sabtang); daddumna a paset ti Babuyan Islands; amianan a daya ken amianan a laud a paset ti daga ti Cagayan (Sta. Ana, Sta. Praxedes, Claveria, ken Sanchez-Mira), ken ti amianan a paset ti Ilocos Norte (Pagudpud).
Adda iti Signal No. 3 dagiti dadduma a paset ti Batanes; amianan ken sentro a paset ti Cagayan (Gonzaga, Lal-lo, Gattaran, Baggao, Alcala, Sto. Niño, Lasam, Allacapan, Camalaniugan, Buguey, Sta. Teresita, Aparri, Ballesteros, Abulug, Pamplona, Rizal, Amulung, ken Piat); amianan ken sentro a paset ti Apayao (Flora, Sta. Marcela, Pudtol, Luna, Calanasan, ken Kabugao); ken ti amianan ken sentro a paset ti Ilocos Norte (Laoag City, Batac, Burgos, Pasuquin, Bangui, Adams, Carasi, Piddig, Vintar, Bacarra, Dumalneg, Nueva Era, Solsona, Dingras, Sarrat, San Nicolas, Currimao, Paoay, Marcos, ken Banna).
Naipan iti Signal No. 2 dagiti dadduma pay a paset ti Cagayan, Isabela, dadduma a paset ti Apayao, Abra, Kalinga, Mountain Province, Ifugao, amianan a paset ti Benguet (Mankayan, Buguias, Bakun, ken Kibungan); amianan a daya a paset ti Nueva Vizcaya (Diadi), ti dadduma pay a paset ti Ilocos Norte, Ilocos Sur, ken ti amianan a paset ti La Union (Sudipen, Bangar, Luna, ken Balaoan).
Adda iti Signal No. 1 ti Quirino, dadduma a paset ti Nueva Vizcaya, Benguet, La Union, Pangasinan, Aurora, Nueva Ecija, Bulacan, Tarlac, Pampanga, Zambales, ken amianan a paet ti Quezon (General Nakar, agraman ti Polillo Islands).
Impakdaar ti PAGASA a napigsa a bayakabak ti marikna iti Batanes, Cagayan, Apayao, ken Ilocos Norte; kasta met iti Ilocos Sur, Abra, ken Kalinga; idinto a makarikna iti bayakabak iti La Union, Benguet, Mountain Province, Ifugao, Isabela, ken Nueva Vizcaya.
Pattapattaen ti PAGASA a mabalin a rummuar ni Nando iti Philippine Area of Responsibility inton Martes, Septiembre 23. (Ellalyn De Vera-Ruiz/Manila Bulletin//Lito Hilidon/Bannawag)
