Inwaragawag ti Manila Police District (MPD) a nairaman ti maysa a grupo dagiti makunkuna a “hiphop gangsters,” a mapapati a naimpluensiaan ti maysa a rapper, kadagiti nakemmeg bayat ti dagiti protest action idi Septiembre 21 iti Siudad ti Manila.
Idinto a sitatalna a naisayangkat ti kangrunaan a programa ti rali iti Luneta, nagsaknap idi agangay dagiti riribuk iti Ayala Bridge, Mendiola, ken Recto, ket nakirupak dagiti dadduma a grupo nga agprotprotestar kadagiti autoridad ken intuangda dagiti barikada dagiti polis.
Segun ken ni PIO Chief Maj. Philipp Ines, naupay ti MPD iti agresibo nga aramid dagiti sumagmamano a nagprotestar, a kaaduan kadagitoy ket naabungotan ti rupada, iti laksid ti pannakaipatungpal ti maximum tolerance.
Kinunana a nagteppel dagiti opisial ti MPD uray idi kimmaron ti riribuk.
Mapukpukaw a nobia, nasarakan iti Pangasinan
Dinakamat dagiti autoridad ti nabilang a 216 a nakemmeg a nagprotestar, a pakairamanan ti 89 a menor de edad.
Mabalin a maidarum dagiti naarestar kadagiti kaso a pakairamanan ti panagpuor, direct assault, ken malicious mischief, depende iti resulta ti agtultuloy nga imbestigasion.
Idinto a nagwaras iti online dagiti report maipapan iti mapapati a natay a napaltogan, inlawlawag ni Department of the Interior and Local Government (DILG) Secretary Remulla nga awan ti naireport (kadakuada) a natay. (Diann Calucin/MB)
