Kinanselar ti Kamara ti plenary session a maangay koma ita a malem ti Lunes, Septiembre 22, kalpasan ti pakdaar ti Malakanyang a pannakasuspenso ti trabaho kadagiti amin nga opisina ti gobierno, segun iti memorandum nga impalgak ti Kamara ita nga aldaw.
Iti memorandum a pinirmaan ni House Secretary General Reginald Velasco, imbilin ni House Speaker Faustino "Bojie" Dy II ti pannakasuspenso ti plenary session ket mayakar inton Septiembre 23 iti 12:00 iti aldaw, a panangtamingda iti nailian a badiet.
Ti General Appropriations Bill (GAB) for 2026 nga aggatad iti ₱6.793 a trilion, a naipila kas House Bill (HB) No.4058, ket manamnama nga isponsoran ni daulo ti Committee on Appropriations Nueva Ecija 1st district Rep. Mikaela Angela "Mika" Suansing.
Maibasar iti memorandum, agtrabaho latta dagiti kameng ti Budget Amendments Review Sub-committe (BARSc) ti Comittee on Appropriations ita nga aldaw, iti Rolando Andaya, Sr. Hall.
Diosdado Banatao, 76, Cagayano a computer genius, entrepreneur, pimmusay
Impaulog ti Office of the President (OP) ti pammilin a mangsuspenso iti trabaho dagiti amin nga opisina ti gobierno iti Metro Manila gapu iti mabalin a napigsa a tudo a yeg ni Super Typhoon "Nando." (Ellson Quismorio/Manila Bulletin//Lito Hilidon/Bannawag)
