Impakita ti International Criminal Court (ICC) ti maysa a dokumento a pakagupgopan ken detalye dagiti tallo a kaso ti murder as a crime against humanity a naipila kontra ken ni dati a presidente Rodrigo Duterte.
Iti nayababa a bersion ti “Document Containing the Charges” a naipaskil iti website ti ICC idi Septiembre 22, naipakita dagiti kaso ni Duterte a pammapatay (murder) ken gandat a panangpapatay (attempted murder) a mapapati a naaramidna idi nagakem a kas mayor ti Davao City ken idi nagakem kas presidente.
Maibasar iti 15 a panid a dokumento nga impila ni ICC Deputy Prosecutor Mame Mandiaye Niang idi Hulio, 2025 ken naipalgak laeng idi Septiembre 22, kunana a masapul a madusa ni Duterte iti pannakapapatay dagiti 76 a biktima ken dua a biktima ti attempted murder.
Ti umuna a kaso ti crime against humanity, napasamak iti nagbaetan ti 2013 agingga iti 2016 a nagpaayan ni Duterte a kas mayor ti Davao City -- nga adda siam nga insidente a napapatayan dagiti 19 a biktima.
Mapukpukaw a nobia, nasarakan iti Pangasinan
Ti maikadua a kaso ti crime against humanity, napasamak kadagiti “High-Value Targets” kadagiti nadumaduma a lugar iti Filipinas bayat ti panagakem ni Duterte a kas presidente iti baet ti 2016 ken 2017 -- nga adda lima nga insidente a napapatayan dagiti 14 a biktima.
Ti maikatlo a kaso, pakairamanan dagiti insidente ti pammapatay ken pananggandat a mangpapatay (attempted murder) a napasamak kadagiti naisayangkat a “barangay clearance operations” kadagiti nadumaduma a lugar ti pagilian iti baet ti 2016 ken 2018 -- a pakairamanan ti 45 a biktima, ket 43 kadakuada ti napapatay.
Segun ken ni Niang, adda sungsungbatan ni Duterte gapu iti akemna a kas indirect co-perpetrator, panangibilin ken/wenno pananguyot; kasta met ti panangtulong ken panangitandudona iti crimes against humanity.
Kuna ni Niang nga idi nagakem ni Duterte a kas mayor ti Davao City ken kas presidente, immatonanna ti maysa a grupo dagit polis, lokal nga opisial, ken babayadan a gunman tapno agpapatay kadagiti maatap a kriminal, umuna babaen ti Davao Death Squad (DDS) kas mayor, ken kas “National Network” idi nagakem a presidente.
Kuna ni Niang a ni Duterte ti daulo ti chain of command, nangaprobar kadagiti operasion, ken nangipinget a panagtungpalda iti “Common Plan” babaen ti kinamatalek, utang, pangta, ken kinaranggas.
Iti sabali a bangir, adda sumagmamano a personalidad a paset ti “Common Plan” a nadakamat iti dokumento ngem saan daytoy nga impalgak ti ICC iti publiko.
Maangay koma ti confirmation of charges hearing ni Duterte ita nga aldaw, Septiembre 23, ngem intantan daytoy ti pre-trial chamber ti ICC kalpasan ti kinuna ti abogado ni Duterte a ni Nicholas Kaufman a saan a kabaelan ni Duterte a sumango iti trial gapu ta managlilipaten daytoy.
Nupay kasta, kinuna ni Bise Presidente Sara Duterte a nakapatangna ti amana a sisasalun-at iti nabiit pay ket nagsaritada ti maipapan iti personal a biagna, pamilia, ken politika. (Raymund Antonio/Manila Bulletin//Lito Hilidon/Bannawag)
