Kiniddaw ti Department of Justice (DOJ) iti Anti-Money Laundering Council (AMLC) ti pannakatengngel ti ad-adu pay a bank account dagiti mapapati a nairaman iti naanomalia a flood control projects ti gobierno, segun ken ni Sekretario ti DOJ Jesus Crispin C. Remulla.
Segun ken ni Remulla, naipatuloddan dagiti kasapulan a dokumento iti AMLC tapno matengngelda dagiti bank account.
Idi napan a lawas, nakaala ti AMLC iti pammalubos manipud iti Court of Appeals (CA) iti dua a freeze order a buklen dagiti 727 a bank account, ken dadduma pay.
Kabayatanna, rinugianen ti DOJ ita nga aldaw, Septiembre 23, ti panangtingitingda no mabalin nga agpaay a kas state witness ni dati a district engineer ti Department of Public Works and Highways (DPWH) Henry Alcantara kadagiti naireport nga anomalia.
Mapukpukaw a nobia, nasarakan iti Pangasinan
Kuna ni Remulla nga inyebkas ni Alcantara ti yaanamongna nga isublina ti kuarta a naalana kadagiti naanomalia a flood control project ti gobierno.
Kuna ni Remulla a malaksid ken ni Alcantara, impeksa met ni dati nga assistant district engineer ti DPWH Bulacan First District Brice Hernandez ti interesna nga agbalin nga state witness.
Idi napan a lawas, rinugian ti DOJ ti panangtingitingda kadagiti agassawa a Cezarah “Sarah” ken Pacifico “Curlee” Discaya a nagkiddaw nga agbalinda met nga state witnesses.
Segun ken ni Remulla, agdalan iti nainget a pannakatingiting dagiti amin nga agngayangay nga agbalin a kas state witness iti DOJ. (Jeffrey Damicog/Manila Bulletin//Lito Hilidon/Bannawag)
