Imbutaktak ni dati a daulo ti Department of Public Works and Highways (DPWH) Bulacan First District Engineering Office Henry Alcantara dagiti senador ken kongresman ken dati a nangato nga opisial ti DPWH a mapapati a nakaala iti binilion a pisos a kickback babaen ti 20-30% a proponent share iti proyekto nga impraestruktura ti gobierno manipud 2019 agingga iti 2025.
Maibasar iti affidavit a pinirmaan ni Alcantara iti naangay a hearing ti Blue Ribbon Committee ti Senado ita nga aldaw, Septiembre 23, dinakamatna ti nagan da dati nga undersecretary ti DPWH Roberto Bernardo, dati a senador Ramon “Bong” Revilla Jr., Sen. Joel Villanueva, Sen. Jinggoy Estrada, Ako Bicol Party-list Rep. Elizaldy “Zaldy” Co, kasta met ti contractor a Ferdstar Builders, kas kangrunaan a nakaala iti bingayda kadagiti naanomalia a proyekto.
Segun ken ni Alcantara, ₱300 a milion ti naited ken ni Revilla idi nagkandidato daytoy a para senador iti kallabes nga eleksion, baaben ti budget insertion idi 2024 General Appropriations Act (GAA).
Agdagup iti ₱600 a milion ti napan ken ni Villanueva manipud kadagiti flood control project malaksid pay iti ₱150 a milion a "proponent share."
DOH, namakdaar iti posible a pannakadangran iti Traslacion
Kinuna ni Alcantara nga adda ₱355 a milion a naisingit iti 2024 budget a para ken ni "SJE" wenno Sen. Jinggoy Estrada.
Inraman met ni Alcantara ni Co a nakaala iti 20-25 a porsiento ti naisingit a badiet nga aggatad iti ₱35 a bilion manipud 2022 agingga iti 2025.
Nairaman pay a nailista iti apidabit ni Alcantara ti nagan ni dati nga opisial ti DPWH ken dati a Caloocan City 2nd District Rep. Mitch Cajayon-Uy, a mapapati a nakaala iti ₱411 a milion babaen ti insertions iti GAA idi 2022, nga addaan tulagan a 10%.
Segun ken ni Alcantara, ni Bernardo ti nangisayangkat kadagiti mailatang a pondo ken mangala kadagiti bingay; ket dinakamatna pay da COA Commissioner Mario Lipana ken Cajayon-Uy mainaig kadagiti listaan ti proyekto ken pannakairuar ti kuarta. (Dhel Nazario/Manila Bulletin//Lito Hilidon/Bannawag)
