Naksayan dagiti bapor ti China iti West Philippine Sea (WPS) gapu iti epekto da Super Typhoon “Nando” ken Tropical Cyclone “Mirasol,” segun iti Armed Forces of the Philippines (AFP) ita nga aldaw, Septiembre 23.
Kuna ni Rear Adm. Roy Vincent Trinidad, panakangiwat ti AFP para iti WPS, a nasaripatpatanda dagiti siam a bapor ti China Coast Guard (CCG) ken maysa a warship People’s Liberation Army–Navy (PLA-N) iti Pag-asa (Thitu) Island, idinto a dua a bapor ti CCG ti nakitada iti Ayungin (Second Thomas) Shoal idi Lunes (Septiembre 22).
Basbassit daytoy ngem iti gagangay a 14 agingga iti 20 a bapor a masarsaripatpatan ti AFP iti linawas, ken awan ti nakitada a bangka ti Chinese maritime militia.
Kasta met a sinuspenso ti AFP ti panagpatruliada iti WPS bayat ti ilalasat ni Bagyo Nando iti Northern Luzon.
Marcos, Robredo, nagsarak iti Naga city
Ngem inlawlawag ni Trinidad nga iti saan nga agbayag ket agsubli met laeng dagiti bapor ti China, ta agpanaw laeng dagitoy no nadawel ti panawen.
Kinuna ni Trinidad nga agtultuloy latta ti panangbantayda iti WPS ken agsubli met laeng iti gagangay a panagpatruliada no natalgeden ti panawen. (Martin Sadongdong/Manila Bulletin//Lito Hilidon/Bannawag)
