Anamongan ti Malakanyang a masapul nga isubli nga umuna dagiti agassawa a Pacifico ken Sarah Discaya dagiti kinabaknangda a mapapati a naala iti dakes a wagas, kas pammaneknek iti "good will" sakbay a maipasidongda iti Witness Protection Program (WPP).
Daytoy ti kinuna ni Undersecretary ti Presidential Comunications Office (PCO) Claire Castro ita nga aldaw, Septiembre 24, kalpasan ti panagsinnubang dagiti senador iti Senado ita a lawas maipapan kadagiti kasapulan sakbay a maikkan iti witness protection.
Inlawlawag ni Castro a nupay saan a naitukit iti Witness Protection, Security and Benefit Act ti nayon a rekititos tapno maipaay ti WPP iti maysa a tao, palubosan daytoy ti Department of Justice (DOJ) a mangituding iti kondision.
Dinakamat ni Castro ti Section 5 paragraph E ti RA 6981 a agkiddaw iti WPP ket "...rumbeng a makitinnulong iti amin a nainkalintegan a kiddaw ti opisial ken empleado ti gobierno a mangipaay iti salaknib kas sagudayen ti Linteg."
Mapukpukaw a nobia, nasarakan iti Pangasinan
Kayatna a sawen, siwawaya ti DOJ a dumawat iti nainkalintegan a rekititos wenno kondision sakbay a mangipaay iti salaknib iti agngayangay a kas state witness.
Segun ken ni Castro, no aklonen dagiti Discaya a nagtakawda iti kuarta ti pagilian, rumbeng laeng nga isublida no ania ti innalada tapno makita ti naimbag a nakemda.
Kuna ni Castro a saan a nainkalintegan a dumawat iti pannakasalaknib ken pondo ti gobierno ti maysa a saksi idinto a kupkupikopanda latta ti kuarta nga inaklonda a tinakawda.
Innayon ni Castro a saanen a nasken nga idarum pay ti gobierno dagiti nagpaay a saksi ta inaklondan ti pannakipasetda iti panagkunniber. (Argyll Cyrus Geducos/Manila Bulletin//Lito Hilidon/Bannawag)
