"Saannakayo a kasapulan ni FPRRD."
Daytoy ti insawang ni Bise Presidente Sara Duterte kas panangsupiatna iti insayangkat dagiti opisial ti Embahada ti Filipinas a “welfare check” para ken ni dati a presidente Rodrigo Duterte, ket kunana a ni Presidente Marcos Jr. ti nangibilin iti daytoy.
Iti maysa nga statement ita nga aldaw, Septiembre 24, imbatad ni Duterte ti nakaro a pungtotna a nangbabalaw iti International Criminal Court (ICC) ken gobierno ti Filipinas.
Segun iti bise presidente, adda naawatna nga impormasion manipud iti Malakanyang a naidanon ken ni Presidente Marcos Jr. ti report manipud iti Embahada ti Filipinas iti The Hague maipapan ken ni dati a presidente Duterte.
Kasapulan ti natibker ken nainkalintegan a pagtaktakderan iti parikut iti WPS --NMC
Kuna ni Sara a nakastrek dagiti opisial ti gobierno ti Filipinas iti detention unit ket nagpammarangda a mangisayangkat iti welfare check ken ininterbiuda ti amana.
Impaganetget ni Sara nga awan sabali a nangibilin iti daytoy no saan a ni Presidente Marcos Jr. a nanglimlimo a kas consular function, ket supiatenna ti isasarungkarda.
Kuna ni Duterte a saan ida a kasapulan ti amana, ta kabaelanda a taripatuen daytoy.
Innayon ni Sara a ti panangipalubos ti ICC iti panangsarungkar dagiti kameng ti gobierno a "nang-kidnap" iti amana, nga awan pammalubos iti pamiliana nga adda iti The Hague, ket mamagpeggad iti biag ti amana.
Binabalaw ni Duterte ti ICC, ket kinunana a no agtultuloy a maisayangkat ti "welfare checks," addanto sungsungbatan ti ICC ken ti gobierno ti Filipinas iti ania man a dakes a mapasamak iti dati a presidente, agraman pannakatayna iti kustodia ti ICC, kas resulta ti panangsarungkarda ken ti welfare check. (Raymund Antonio/Manila Bulletin//Lito Hilidon/Bannawag)
