Maysa nga organisado a grupo ti nangpataud iti riribuk iti Mendiola, a nakairamanan dagiti menor de edad, a panggepda a rippuogen ti gobierno, segun ken ni Secretary ti Department of Interior and Local Government (DILG) Jonvic Remulla.
Iti waragawagna idi Septiembre 23, pinatalgedan ni Remulla a nangala ti grupo kadagiti ubbing nga agtawen iti 11 manipud iti Quiapo ken binayadanda dagitoy iti ₱3,000 tapno makiramanda iti panangriribuk.
Kuna ni Remulla a daytoy a grupo ti nangbilin kadagiti ubbing a no kabaelanda a puoran ti Malakanyang ket puoranda.
Segun ken ni Remulla, saan a ti panangitandudo iti pagimbagan ti panggep dagiti nangriribuk, no di ket nabayadanda tapno mangpataud iti riribuk nga awan ti nalawag a nasayaat a panggepda.
Senado, pinasingkedanna ti ₱6.793-trilion a nailian a badiet para 2026
Mapan a 217 a tao ti im-imbestigarenda, agraman ti 95 a menor de edad.
Reprepasuen ti DILG dagiti bideo iti social media, agraman dagiti ladawan tapno matakuatanda no asino ti grupo a nangbayad ken nagorganisar iti riribuk.
Kinompirmar ni Remulla nga addan timpuar a sumagmamano a nagan, ngem saanda pay nga indarum.
Kaso nga arson, destruction of property, inciting to sedition, ken sedition ti mabalin nga ipila a maibusor iti grupo. (Lloyd Caliwan/PNA//Lito Hilidon/Bannawag)
