Dumawdawat iti tulong dagiti umili ti Calayan, Cagayan manipud iti nailian a gobierno bayat ti panangallangonda iti bagida gapu ken super typhoon Nando.
Kuna ni Al Llopis, daulo ti Calayan Association of Barangay Captains (ABC), iti maysa nga interbiu, adu a balay, bilog, ken pagay ti nadadael gapu iti didigra.
Insennaay ni Llopis a tinawen a tuparen ti bagyo ti lugarda, ngem saanda pay a nakaawat iti tulong manipud iti nailian a gobierno.
Segun ken ni Llopis, nangipaayen iti tulong ti gobierno ti probinsia ti Cagayan, ngem saan nga umdas daytoy gapu iti kaadu ti nadadael, isu nga agtignay koma ti nailian a gobierno.
Senado, pinasingkedanna ti ₱6.793-trilion a nailian a badiet para 2026
"Sapay koma ta makita ti nailian a gobierno ti kasasaadmi ditoy, ta umilikami met ditoy," kuna ni Llopis.
Iti sabali a bangir, nangipatulod ni Gobernador. Edgar Aglipay ken ni Department of Social Welfare and Development (DSWD)-2 Director Lucy Alan iti family food packs kadagiti inapektaran ti bagyo iti Santa Ana, Cagayan idi Martes (Septiembre 23).
Nakaawat dagiti residente ti Barangay Palawig iti 121 a family food packs ken mainum a danum; idinto a naikkan met iti tulong dagiti 169 a pamilia manipud iti Barangay Casambalangan.
Segun ken ni Aglipay, agtultuloy ti pannakikoordinarda iti DSWD-Region 2 para iti pannakaipaay ti tulong kadagiti inapektaran ni Bagyo Nando. (Tristan Lozano/Manila Bulletin//Lito Hilidon/Bannawag)
