Walo a ganggannaet ti nakemmeg gapu iti mapapati a panagtrabtrabahoda nga awanan iti work visa iti maysa a copper and gold mining site iti Isabela, kinuna ti Bureau of Immigration (BI) ita a Huebes, Septiembre 25.
Kinuna ni BI Commissioner Joel Anthony M. Viado a nakemmeg ti pito a Chinese nationals ken maysa a Taiwanese idi Martes, Septiembre 23, iti pagminasan iti ili ti Dinapique, babaen dagiti operatiba ti BI iti pannakikoordinarda iti Armed Forces of the Philippines (AFP), Philippine National Police (PNP), ken National Bureau of Investigation (NBI).
Kinuna ni Viado a natiliw dagiti walo a ganggannaet gapu iti panaglabsingda iti Philippine Immigration Act of 1940, partikular gapu iti panagtrabahoda nga awanan ti permit wenno visa, gapu ta undocumented-da, ken gapu iti panagtrabahoda iti ruar ti petitioning company-da.
“Dagiti ganggannaet nga umay ditoy tapno gundawayanda ti dagdagatayo nga awan panagraemda kadagiti lintegtayo, maipasango iti pannakaarestar, pannakaibalud, ken pannakaideportar,” indeklara ni Viado. (Jeffrey Damicog/MB)
