Inlibak da Senador Francis “Chiz” Escudero ket dati a senador Nancy Binay, ita a Huebes, Setiembre 25, nga adda pakainaiganda iti ania man a "ghost" wenno anomalia kadagiti proyekto ti gobierno a mangkontrol iti layus, kas impalgak ti dati nga undersecretary ti Department of Public Works and Highways (DPWH).
Iti hearing ti Senate Blue Ribbon Committee, nagtestigo ni dati a DPWH undersecretary Roberto Bernardo ken imbagana a ti pannakairaman da Escudero, dati a senador Nancy Binay ken Ramon “Bong” Revilla, Jr. ken Rep. Zaldy Co.
“Ilibakko a sipipinget dagiti malisioso nga alegasion ken innuendos nga inaramid ni dati a DPWH Usec. Roberto Bernardo iti Senate Blue Ribbon Committee (hearing) ita. Segun met la iti bukodna a panangadmitir, saan a naaaddaan isuna iti direkta a kontak kaniak maipapan iti daytoy a banag—ket paneknekak nga agul-ulbod maipapan iti maipagarup a pannakairamanko,” kinuna ni Escudero iti maysa a statement.
Segun kenkuana, sanguen ken labananna ti akusasion ket mangipila iti umisu a reklamo kontra ken ni Bernardo gapu kadagiti impalgak daytoy a kuna ti senador nga "awan serserbina ken awan pammaneknekna a pammabasol."
Senado, pinasingkedanna ti ₱6.793-trilion a nailian a badiet para 2026
"Iti nasurok a 27 a tawen iti serbisio publiko, diak pay pulos a naidarum iti uray naminsan laeng iti panagkunniber. Ti rekordko ti makapaneknek. Mamatiak nga inton maipalgak amin a kinapudno, agtalinaed a di marugitan ti naganko ken ti serbisiok," impaganetgetna.
Iti maysa met nga statement ni Sen. Nancy Binay, inyebkasna met ti pannakadismayana gapu iti pannakainaigna kadagiti anomalia ti flood control.
“Masmasdaawak ken malidayanak ta iramramanda kadagiti anomalia ti DPWH. Awan kinaagpaysuananna dagiti pammabasolda kaniak," kinuna ni Binay.
“Naulimektayo nga agtrabtrabaho a kas mayor ti Makati. Makapakigtot man ta us-usarendatayo tapno pangilisi kadagiti pudpudno a rebbengna a mapagsungbat ityi daytoy nga issue,” kinunana.
“Nalaka ti agibaga kadaghiti biddut ken pammardaya a sarsarita. Ngem ti nagapuanak iti serbisio publiko ket kanayon a nangnangruna iti saan a mapagduaduaan," innayon ti dati a senadora. (Hannah L. Torregoza/MANILA BULLETIN)
