Mapadayawan ni Dr. Myrna A. Laigo-Carreon, dati a presidente ti Union Christian College, City of San Fernando, La Union, bayat ti 54th PAFTE National ken 15th International Convention, a kas maysa kadagiti mabigbig a nagpaay a presidente dagiti kolehio ken unibersidad iti pagilian a kameng ti Philippine Association for Teachers and Educators, Inc. (PAFTE).
Maangay ti kombension nasional ken internasional ti PAFTE inton Oktubre 9-10, 2025 iti Saint Louis University, Baguio City, nga addaan iti tema a “Teacher Education for Sustainable Development: Intregrating the SDGs for Teacher and Learner Development.
Maysa ni Dr. Carreon kadagiti 46 a maipaayan iti pammadayaw iti sibubukel a pagilian ken kakaisuna nga awardee manipud iti Region 1.
Patanor ti UCC, nagturpos ni Dr. Carreon iti daytoy a pagadalan iti hayskul ken iti kolehio ken ditoy met laeng ti nangrugianna a nagtrabaho a kas mannursuro. Babaen ti ikutna a natibker a pundasion akademiko ken na-Kristianuan a sursuro, in-inut a ngimmato iti ranggo agingga iti nagbalin a prinsipal, sa kas dekana ti Teacher Education, ken iti pannakapilina a presidente ti alumni association ti UCC, imbagianna ti organisasion iti hunta ti Kolehio—agingga iti pannakadutokna a kas umuna a babai a nakaipaayan ti full-term tenure a kas College President idi 2012.
Nabotosan, baro nga opisial ti Ilocos Sur Provincial Capitol Press Corps
Addaan iti doktorado iti edukasion a nakaasaanna iti educational management ken panangidaulo, inturong ni Dr. Carreon ti kinapresidentena iti pannakapapigsa ti pannakaam-ammo ti UCC a kas Center of Teacher Training iti sibubukel a rehion. Inlungalongna dagiti dadakkel a reporma akademiko ken institusional, inyusuatna dagiti lokal ken internasional nga study tours, ken nakikammayet kadagiti global partner institution tapno mapalawa ti panirigan, saan laeng a dagiti mannursuro no di pay ket dagiti estudiante. Iti panagpaayna a presidente, inkalikagumna ti nangatngato pay a kalidad ti Kolehio, pinairutna ti langenlangen ti Kolehio ken ti komunidad, ken pinarangenna ti na-Kristianuan a mision ti Kolehio a naibatay iti serbisio, integridad, ken panagbalbaliw.
Mairaman kadagiti adu nga inyusuatna nga inisiatibo ti pannakabangon ti UCC Global Alumni Association a naangay ti umuna a global reunion daytoy iti California, USA, idi Oktubre 2015. Agingga ita, aktibo ni Dr. Carreon iti alumni work ken fundraising ken iti pannakaisaad dagiti agpaut a proyekto ken programa a para iti Kolehio. Malaksid itoy, am-ammo pay ni Dr. Carreon a kas maysa kadagiti dadaulo iti United Church of Christ in the Philippines (UCCP) a tumultulonganna iti benneg ti Christian education ken women’s ministry. Iti laksid met ti panagretirona a presidente ti Kolehio idi 2017, nagtultuloy ti panagserbina iti UCC a kas propesor iti graduate school.
Uppat ti bungada iti kaingungotna a ni Nelson Carreon, patubo met laeng ti UCC, da Mark Anthony (doktor iti medisina), Rynel Jan (Android developer), Elimar Andree (virtual assistant ken entrepreneur), ken Kryssanthi Anne (digital marketing specialist).
