Ninaganan ni dati nga Undersecretary for Operations ti Department of Public Works and Highways (DPWH) Roberto Bernardo ti maysa a senador ken dua a dati a senador, maysa a kongresman, ken opisial ti DPWH a nairaman iti anomalia dagiti flood control project.
Iti naangay a hearing ti Blue Ribbon Committee ti Senado ita nga aldaw, Septiembre 25, nangidatag ni Bernardo iti apidabit ken kiddaw a maipasidong isuna iti Witness Protection Program (WPP) ta agpeggad iti biagna ken iti pamiliana gapu iti impalgakna.
Segun ken ni Bernardo, nagtutulag dagiti inheniero iti Bulacan 1st District Engineering Office a mangontratada iti proyekto ti gobierno babaen ti panagusarda iti lisensia dagiti dadduma a contractor a nagbanag iti ghost project, ken adda "20-20-20-40” a panangbibingay ti tunggal maysa.
Dinakamat ni Bernardo da Henry Alcantara, Engr. Brice Hernandez, Engr. Jaypee Mendoza, ken Engr. Arjay Domasig a nangisayangkat iti kastoy a wagas ti panagganansia.
Senado, pinasingkedanna ti ₱6.793-trilion a nailian a badiet para 2026
Ni Ako Bicol Party-list Rep. Zaldy Co ti maysa kadagiti dinakamat ni Bernardo a mangal-ala iti 25 a porsiento a komision.
Maysa met ni dati a presidente ti senado Francis “Chiz” Escudero kadagiti dinakamat ni Bernardo, a nakaala iti 20 a porsiento a komision babaen iti negosiante a ni Maynard Ngu, a maysa a campaign contributor ni Escudero.
Nairaman met ni dati a senador Ramon “Bong” Revilla, a segun ken ni Bernardo ket nagkiddaw iti 25 a porsiento ti pondo dagiti proyekto idi 2024.
Impalgak pay ni Bernardo a nangitulod isuna iti ₱37 a milion a para ken ni dati a senador Nancy Binay iti maysa a balay iti Quezon City, nga inkumitda kenkuana a 15 a porsiento ti dagup ti balor ti proyekto, kas kiddaw ni Carleen Villa, a maysa a confidant ni Binay idi 2024.
Kalpasan a nagtestimonia, naipan ni Bernardo iti Department of Justice (DOJ) tapno masukimat ni Secretary Jesus Crispin "Boying" Remulla ti testimoniana. (Dhel Nazario/Manila Bulletin//Lito Hilidon/Bannawag)
