Imbalakad ti Department of Foreign Affairs (DFA) ita nga aldaw, Septiembre 25, kadagiti Filipino nga addaan iti H-1B visa a liklikanda pay laeng ti agbiahe iti ruar ti Estados Unidos (US) bayat a naipakat ti $100,000 nga application fee nga impaulog ti administrasion ni Trump.
Itay napan a lawas, inawaragawag ti administrasion ni Trump nga ipakatda ti maminsan laeng a bayadan a $100,000 para iti panagaplay iti H-1B visa (visa application) kadagiti baro nga aplikante.
Nangpataud daytoy iti pannakariro ken pannakakellaat dagiti industria iti US nga agpannuray kadagiti skilled worker a ganggannaet.
Segun iti DFA, ti baro a pagalagadan a mangtengngel iti iseserrek dagiti non-immigrant worker iti US ket nagbalin a pakaseknan dagiti Filipino sadiay.
Kasapulan ti natibker ken nainkalintegan a pagtaktakderan iti parikut iti WPS --NMC
"Pakdaaranmi dagiti kailiantayo nga addaan iti H-1B visa a liklikanda pay laeng ti di kasapulan a panagbiahae iti ruar ti US, agingga a malawagan ti maipapan iti iseserrek manen iti US."
Ngem no saan a talaga a maliklikan ni panagbiahe iti ruar ti US, imbalakad ti DFA kadagiti mangmangged a Filipino iti US a kaumanda kadagiti employer-da ta mabalin a makiddaw nga ibaklayda ti nayon a babayadan iti iseserrek ti empleadoda iti US.
Maibasar iti datos ti DFA, adda 1.3 a porsiento ti FIlipino a mangmangged nga addaan iti H-1B visa ken saan a maapektaran dagiti addan iti US.
Innayon ti DFA nga imonmonitor ti Emabahada ti Filipinas iti Washington ken ti Consulates General iti US ti baro a pagalagadan, ken sisasaganada a mangipaay tulong ken mangaywan kadagiti komunidad ti Filipino sadiay. (Raymund Antonio/Manila Bulletin//Lito Hilidon/Bannawag)
