Kiniddaw ti pre-trial chamber ti International Criminal Court (ICC) iti The Netherlands, ken maysa pay a pagilian a saan a naipalgak iti dokumento, a mangidatag kadagiti paliiwda maipapan iti posibilidad ti panangpasangbayda ken ni dati a presidente Rodrigo Duterte maipanggep iti kiddawna nga interim release.
Iti lima a panid a dokumento idi Hunio 18 a naipalgak iti publiko idi Septiembre 23 iti website ti ICC, dinakamat ti Pre-Trial Chamber I (PTC I) ti kiddaw ti depensa nga agkiddawda iti paliiw manipud iti host state (Netherlands), saan laeng nga iti panangibiaheda iti teritorioda no di ket pay iti posibilidad ti panangpasangbayda ken ni Duterte iti pagilianda para iti dadduma a paset wenno iti entero a panawen ti interim release, no bilang ta mapatgan daytoy.
Inlawlawag ni PTC I Presiding Judge Iulia Antoanella Motoc, a ti panagkiddawda iti paliiw manipud iti dua a pagilian ket saan a nasaksakbay a panangipato iti kiddaw nga interim release.
Kuna ti PTC I a masapul a mangidatag iti komento ti The Netherlands no kayatda ken kabaelanda a pasangbayen ni Duterte iti pagilianda, no kabaelanda nga ipatungpal dagiti kondision nga ipaulog ti ICC, ken no kabaelanda nga ibiahe ni Duterte manipud iti pagilianda nga agturong iti The Netherlands (ICC) tapno dumar-ay iti hearing.
DOH, namakdaar iti posible a pannakadangran iti Traslacion
Nupay kasta, awan pay ti damag maipapan iti paliiw ti The Netherlands ken ti pagilian a maipagarup nga immanamong a mangpasangbay ken ni Duterte no bilang mapatgan ti interim release.
Dua ti nakapila a mosion ti depensa iti PTC I: ti panangkuestionarda iti hurisdiksion ti ICC, ken ti kiddawda nga interim release. (Raymund Antonio/Manila Bulletin//Lito Hilidon/Bannawag)
