Sigaganetget ni Cavite 4th district Rep. Francisco "Kiko" Barzaga a mangplanplano iti panangagawna iti takem ni House Speaker Faustino "Bojie" Dy III, ket mamati unay a suportaran isuna ni Majority Leader Ilocos Norte 1st district Rep. Sandro Marcos, a kunana a daytoy ti mangted kenkuana iti kasapulanna a botos.
Segun ken ni Deputy Speaker Iloilo 1st district Rep. Janette Garin, ibagbaga ni Barzaga iti napalabas a sumagmamano nga aldaw a makalawas laeng ti panagtakem ni Dy kas Speaker.
"Ibagbagana kadakami: 'Makalawas laeng (nga agtugaw) dayta nga Speaker. Ket sukatak isuna.', kinuna ni Garin idi rabii ti Mierkoles, Septiembre 24.
"Kayatna la unay ti agbalin nga Speaker," napaliiw ni Garin.
DOH, namakdaar iti posible a pannakadangran iti Traslacion
Idi Septiembre 24 ti umuna a lawas ni Dy a kas kangatuan nga opisial ti House of Representatives.
Imbes a suportaranda ti panggep ni Barzaga a mangagaw iti kina-Speaker, nagtalinaed a makumikom dagiti kameng ti Kamara iti marathon plenary debates maipapan iti ₱6.793-trillion a General Appropriations Bill wenno ti naisingasing a nasional a badiet para iti 2026.
Ngem bayat ti pannakaisardeng dagiti plenary debate idi Mierkoles, inasitgan ni Barzaga ni Marcos ket im-video-na nga i-vlog ti panangsingana iti majority leader.
Segun iti sabali pay a kameng ti Kamara a nagkedked a mainaganan, ikagkagumaan ni Barzaga a piliten ni Marcos a mangsuportar iti kandidaturana a para Speaker, ta babaen iti inananamaenna a suporta ti majority leader, patien ni Barzaga a makagun-od iti umdas a bilang manipud iti nasurok a 300-kameng a Kamara a mangibotos kenkuana kas Speaker. (Ellson Quismorio/MB)
