Binilin ti Malakanyang dagiti nadumaduma nga ahensia ti gobierno nga ipatungpalda ti 2024 National Disaster Response Plan (NDRP) a nangibinsabinsa kadagiti estratehia para iti pannakaikabassit ti peggad iti panawen ti didigra.
Naipaulog ti pammilin babaen ti Memorandum Circular No. 100 a pinirmaan ni Executive Secretary Lucas Bersamin idi Septiembre 23.
Tarigagay ti NDRP a salakniban dagiti biag, mangipaay iti nadaras a kasapulan iti naapektaran a komunidad, ken mangkissay iti epekto ti didigra babaen ti epektibo ken naipasdek a panagresponde iti didigra ken early recovery operations.
Segun iti memorandum, ti National Disaster Risk Reduction and Management Council (NDRRMC), babaen ti Office of Civil Defense (OCD), ti mangidaulo iti pannakaipatungpal ti 2024 NDRP.
DOH, namakdaar iti posible a pannakadangran iti Traslacion
Imandar ti memorandum ti pannakikoordinar ti Presidential Communications Office (PCO) ken OCD iti pannakaiwaragawag ti 2024 NDRP kadagiti amin a maseknan nga ahensia ken opisina.
Inrekomendar ti NDRRMC ti pannakaadaptar ti 2024 NDRP a mangipaay kadagiti wagas a mangikabassit ken mangiwardas kadagiti pagpeggadan iti tiempo ti didigra kadagiti naapektaran a komunidad. (Betheena Unite/Manila Bulletin//Lito Hilidon/Bannawag)
