Masapul a maiwayat ti full record check and background investigation (RCBI) iti "surprise witness" a ni Orly Regala Guteza, gapu iti kadagsen ti testimoniana iti hearing ti Blue Ribbon Committee ti Senado idi Huebes, Septiembre 25.
Daytoy ti kinuna ni Senate President Pro Tempore Panfilo "Ping" M. Lacson ita nga aldaw, Septiembre 26.
Segun ken ni Lacson, daulo ti Senate Blue Ribbon Committee, ni Guteza ket dati a lameng ti Philippine Marines ken dati a security consultant ni Rep. Elizaldy Co. Naiparang ni Guteza a kas witness idi Septiembre 25 nga awan ti courtesy of notice, wenno saan a naipakaammo nga umuna iti daulo ti komite, sakbay a naiparang a kas saksi.
Ni Sen. Rodante Marcoleta ti nangiparang ken ni Guteza a kas "surprise witness" iti hearing, a segun ken ni Marcoleta, ket inrekomendar ni dati a kongresman Michael Defensor.
Mapukpukaw a nobia, nasarakan iti Pangasinan
Iti testimoniana, kinuna ni Guteza a napan nagideliber iti kuarta a naikabil iti luggage, nga addaan iti codename a "basura," iti balay da Co ken dati nga Speaker Martin Romualdez.
Ngem maysa a nagparikutan ti situasion ti imbutaktak ti abogado a maipagarup a nangpirma ken nangnotario iti affidavit ni Guteza, a segun kenkuana (abogado) saan nga isuna ti nangnotario ken nagpirma iti dokumento.
Segun ken ni Atty. Petchie Rose Espera, saan nga isuna ti nangnotario, nangpirma, wenno nakipaset iti pannakaaramid ti affidavit ni Guteza, gapuna a palsipikado ken saan nga autorisado dagiti pirma ken detalye ti notario a nangiparang iti nagan ti abogado.
Iti sabali a bangir, kinuna ni Lacson nga awan ti parikut iti biang ti Blue Ribbon Committee no boluntario nga agparang ni Co iti panagimbestigarda kadagiti naanomalia a flood control project. (Hannah L. Torregoza/Manila Bulletin//Lito Hilidon/Bannawag)
