Nagdisso ni Severe Tropical Storm Opong (international name: Bualoi) iti Milagros, Masbate ita nga aldaw, Septiembre 26, ken agturongen iti Romblon iti las-ud ti sumagmamano nga oras, segun iti Philippine Atmospheric, Geophysical and Astronomical Services Administration (PAGASA).

Namitlon a nagdisso iti daga ni Opong: umuna iti San Policarpo, Eastern Samar idi 11:30 iti rabii ti Huebes (Septiembre 25); maikadua iti Palanas, Masbate itay 4:00 iti parbangon (Septiembre 26); ken maikatlo iti Milagros, Masbate itay 5:30 iti parbangon.

Itay 7:00 iti agsapa, nasaripatpatan ti PAGASA ti sentro ni Opong iti baybay ti Mandaon, Masbate.

Agpigsa ni Opong iti 110 a kilometro kada oras iti asideg ti sentrona, ken pugso nga agingga iti 150 a kilometro kada oras, ket agpalaud amianan a laud iti kaprdas a 30 a kilometro kada oras.

Nasional

Committee on Justice ti Kamara, kabaelanda a tamingen ti dua nga impeachment complaint

Segun iti PAGSA, mabalin a lumabas wenno agdisso ni Opong iti Romblon, Oriental Mindoro, wenno Occidental Mindoro iti las-ud ti 12 nga oras sakbay a makadanon iti West Philippine Sea itoy a malem wenno rabii.

Naipan iti Signal No. 3 ti Sorsogon, Masbate, agraman Ticao ken Burias Islands, Albay, laud ken abagatan a paset ti Camarines Sur, southern Quezon, Marinduque, Romblon, Oriental Mindoro, Occidental Mindoro, agraman Lubang Islands, Batangas, abagatan ti Laguna, laud a paset ti Northern Samar ken Samar, ngudo nga amianan ti Biliran, amianan a laud ti Capiz, amianan a paset ti Aklan, ken Caluya Islands.

Adda iti Signal No. 2 ti Catanduanes, ti dadduma a paset ti Camarines Sur, Camarines Norte, ti dadduma a paset ti Quezon, dadduma a paset ti Laguna, Rizal, Cavite, Metro Manila, Bulacan, Pampanga, Bataan, southern Zambales, Calamian Islands, dadduma a paset ti Northern Samar, amianan a paset ti Eastern Samar, amianan ken sentro a paset ti Samar, ti daddma a paset ti Biliran, amianan a Leyte, amianan a Cebu, agraman Camotes ken Bantayan Islands, ngudo ti amianan a paset ti Negros Occidental, amianan a paset ti Iloilo, ti dadduma a paset ti Capiz, ti dadduma a paset ti Aklan, ken amianan a laud a paset ti Antique.

Signal No. 1 iti Quirino, abagatan ken sentro a paset ti Nueva Vizcaya, sentro ken abagatan a paset ti Benguet, sentro ken abagatan a paset ti La Union, Pangasinan, sentro ken abagatan a paset ti Aurora, Nueva Ecija, Tarlac, dadduma a paset ti Zambales, Cuyo Islands, amianan a paset ti daga ti Palawan, dadduma a paset ti Eastern Samar, dadduma a paset ti Samar, dadduma a paset ti Leyte, Southern Leyte, daya ken sentro a paset ti Bohol, sentro a paset ti Cebu, amianan ken sentro a paset ti Negros Occidental, sentro a paset ti Iloilo, sentro a paset ti Antique, Dinagat Islands, ken Surigao del Norte, agraman Siargao Island ken Bucas Grande Islands.

Pattapattaen ti PAGASA a rummuar ni Opong iti Philippine area of responsibility inton Sabado iti malem (Septiembre 27). (Ellalyn De Vera-Ruiz/Manila Bulletin//Lito Hilidon/Bannawag)