Nangted ni Justice Secretary Jesus Crispin C. Remulla iti instruksion nga agkidkiddaw iti International Criminal Police Organization (Interpol) a mangipaulog iti "Blue Notice" kontra ken ni Ako Bicol Party-list Rep. Elizaldy "Zaldy" S. Co tapno masarakan ti lokasion ken mamonitor ti aktibidad ti kongresman iti abroad.
Naibatay ti kiddaw iti Interpol iti kriminal nga imbestigasion ken ni Co kadagiti naanomali a flood control project, kinuna ti Department of Justice (DOJ).
Segun iti website ti Interpol, ti "Blue Notice" ket kiddaw dagiti miembro a pagilian a “mangurnong iti nayon nga impormasion maipapan iti kinasiasino, lokasion wenno aktibidad ti maysa a tao mainaig iti kriminal nga imbestigasion.”
Inrekomendar ti National Bureau of Investigation (NBI) ti kriminal a pannakaidarum ni Co, agraman dadduma pay a tattao, gapu kadagiti flood control project.
Marcos, Robredo, nagsarak iti Naga city
Segun kadagiti damag, pimmanawen ni Co iti Estados Unidos ket nagturong iti Spain. Kinanselaren ti Kamara ti travel authority ni Co iti abroad.
Sakbayna, inikkan ni House Speaker Faustino "Bojie" Dy III ti ultimatum ni Co nga agsubli iti Filipinas agingga iti Lunes, Septiembre 29 tapno sanguenna dagiti alegasion kontra kenkuana. (Jeffrey Damicog/MANILA BULLETIN)
