Imbilin ni Presidente Marcos Jr. ti pannakaituding ti floor price wenno kababaan a presio ti irik tapno masalakniban dagiti mannalon kadagiti mananggundaway a negosiante a manggatang iti apitda iti nakababbaba unay a presio.
Iti naangay a taripnong iti Malakanyang idi Septiembre 25, binilin ni Marcos ti Department of Agriculture (DA) a makikoordinar iti Office of the Executive Secretary ken iti opisina ni Senador Francis “Kiko” Pangilinan iti panangbukelda iti maysa nga executive order a mangikeddeng iti kababaan a presio ti irik.
Impaganetget ni Marcos a nupay bimmaban ti presio ti bagas iti merkado, nalaklaka latta ti presio ti irik iti taltalon no tiempo ti panagapit.
Ni Pangilinan, daulo ti Senate Committee on Agriculture, Food, and Agrarian Reform, ti nangisingasing iti daytoy iti naangay a taripnong, a nangiparang iti kinaawan-gaway dagiti mannalon kadagiti negosiante a mangabuso iti panagadu ti suplay ti bagas iti tiempo ti panagapit.
DOH, namakdaar iti posible a pannakadangran iti Traslacion
Imbilin pay ni Marcos ti pannakaipatungpal ti Sagip Saka Act of 2019, a mangted iti karbengan kadagiti ahensia ti gobierno ken local government unit (LGU) a direkta a gumatang iti produkto dagiti nairehistro a mannalon ken mangngalap.
Kiniddaw ni Marcos ti pannakarepaso ti paglintegan ti National Food Authority (NFA) ti akemna a mangpatalged tii presio ti bagas ket saan nga agpannuray iti importasion, kasta met ti pannakaamendar ti Agricultural Tariffication Law of 2024, tapno mapapigsa ti probision a mangipaay iti tulong kadagiti mannalon. (Argyll Cyrus Geducos/Manila Bulletin//Lito Hilidon/Bannawag)
