Nangipaayen ti Philippine National Police (PNP) iti tulong para iti kinatalged dagiti kameng ti Independent Commission on Infrastructure (ICI) nga agimbestigar kadagiti mapapati nga anomalia dagiti flood control project iti entero a pagilian.
Kuna ni Acting PNP Chief Police Lieutenant General Jose Melencio C. Nartatez, Jr. ita nga aldaw, Septiembre 26, a nangted ti regional field units (RFU) ti Criminal Investigation and Detection Group (CIDG) iti tulong a para iti seguridad ken iti panangidokumentar dagiti inspektor ti ICI kadagiti maisayangkat a field validation idi Septiembre 25.
Segun ken ni Nartatez, tumultulong ti CIDG iti panagkalap ken panangurnos kadagiti dokumento nga addaan iti certified true copies manipud kadagiti regional office ti DPWH, tapno masalakniban ti ebidensia.
Nangipaayda met iti seguridad kadagiti engineer ken inspector a mangiwayat iti material testing ken panangsarungkar kadagit lugar nga addaan flood control project tapno masigurado nga awan ti makatubeng iti panagimbestigarda.
Senado, pinasingkedanna ti ₱6.793-trilion a nailian a badiet para 2026
Iti Davao Region, binantayan ti FRU11 ti isasangpet da ICI Special Adviser Baguio City Mayor Benjamin Magalong, ken DPWH Secretary Vivencio Dizon idi napanda ininspeksion ti maysa a flood control project iti Barangay Culaman, Jose Abad Santos, Davao Occidental a nai-report a nalpasen idi 2022, ngem natakuatanda nga iti napalabas a dua a lawas pay laeng a narugian. (Martin Sadongdong/Manila Bulletin//Lito Hilidon/Bannawag)
