Inawagan ni ACT Teachers Party-list Rep. Antonio Tinio ti Anti-Money Laundering Council (AMLC) nga "awan serserbina" gapu iti dida man laeng a pannakaangot kadagiti panagkunniber a mainaig kadagiti naanomalia a flood control project babaen dagiti nagdakdakkel a kuarta a mairuruar iti banko.
Iti naangay a plenary debate ti Kamara idi Septiembre 25 maipanggep iti ₱6.793 a trilion a General Appropriations Bill (GAB) wenno ti singasing a national budget para iti 2026, saan a nateppelan ni Tinio ti saona idi imtuodenna ti AMLC ta saanda man la a nalapdan dagiti mapagduaduaan a transaksion, kas iti pannakai-withdraw dagiti nagdadakkel ti gatadna a kuarta.
Segun ken ni Tinio, inlawlawag ti AMLC nga awan ti bilegda ken agpannurayda laeng kadagiti report, iti panangtingiting ken report dagiti banko no maipanggep iti pannakairuar ken pannakayakar ti dadakkel a gatad ti kuarta.
Gapuna, uray adda mangiruar iti ₱100 a milion iti maysa a transaksion, no pagarupen ti banko a paset daytoy ti gagangay a sistema ti negosio, saan nga agi-report ti banko iti AMLC.
Mapukpukaw a nobia, nasarakan iti Pangasinan
Segun iti isponsor ti badiet ti AMLC, sigsiguraduen laeng ti ahensia ti pannakaannurot dagiti pagalagadan kadagiti tao a salakniban ti AMLC.
Impaganetnet ni Tinio nga awan serserbi ti AMLC ta saanda a malapdan dagiti panagkunniber isu a maibutaktak itan dagiti rinuker a senador, kongresman, ken opisial ti DPWH a mangal-ala iti porsientoda kadagiti proyekto ti gobierno. (Ellson Quismorio/Manila Bulletin//Lito Hilidon/Bannawag)
