Naambus ken napalpaltogan ti maysa a 31-anios a civil engineer a babai a nakalugan iti maysa a van iti asideg ti pagtaenganna iti Sitio Nagmarcaan, Brgy. San Marcelino, Dingras, Ilocos Norte idi sardam ti Biernes, Septiembre 26.
Iti pannakasursurat daytoy a damag ita a malem ti Sabado, Septiembre 27, naammuan a pimmusayen ti biktima bayat ti pannakataming kenkuana iti ospital.
Segun kadagiti damo a report, naisadsad iti kanal ti kalsada ti van kalpasan ti pannatambang daytoy. Nasarakan dagiti immarayat ti daradara a biktima iti uneg ti nalsok ken nabubuong ti tawana a luganna. Naipadamag a natamaan ti buksit ken abaga ti biktima, a naitaray a dagus iti ospital.
Nakaala dagiti polis iti nagawangan ti lima a bala ti kalibre .45 a paltog iti nakaambusan ti saan pay a nainaganan a biktima. Addan iti kustodia ti Dingras Municipal Police Station ti puraw a Mitsubishi L300 a lugan ti biktima tapno masukisok.
Farm specialist iti Abra, napaltogan
Segun kadagiti report, mapapati a maysa a kontraktor ti biktima.
Saan pay a naammuan ti kinasiasino ti/dagiti nagambus ken no ania ti motibo ti pammaltog bayat nga agtultuloy ti inwayat nga imbestigasion dagiti pannakabagi ti linteg. (rva)
