Dinagadag ti Philippine National Police (PNP) dagiti nagannak ken mangbambantay kadagiti 55 a menor de edad a nakemmeg iti nariribuk a rali iti Manila idi napan a lawas, nga an-anayenda koma ti panangilisida kadagiti ubbing manipud kadagiti tao wenno grupo a maipagarup a mangisarsarak kadakuada nga agaramid iti maikaniwas.
Ti 55 nga ubbing ti sumagmamano laeng kadagiti naisaklang iti estasion ti polis kalpasan a makemmegda gapu iti mapapati a panangrautda kadagiti polis ken panangdadaelda kadagiti sanikua iti rali iti Ayala Bridge ken Mendiola idi Septiembre 21.
Segun ken ni acting PNP chief Lt. Gen. Jose Melencio Nartatez, Jr., ti pannakawayawaya dagiti menor de edad, agraman ti 25 a nataengan, ket pammaneknek a raemen ti polis ti due process ken legal a proseso.
Kuna ni Nartatez a nupay rumbeng a madusa dagiti nakabasol, bigbigen ti PNP a kasapulan a maiwanwan a naan-anay dagitoy, nangruna ta ubbingda pay laeng.
Senado, pinasingkedanna ti ₱6.793-trilion a nailian a badiet para 2026
Nayawat dagiti menor de edad iti Department of Social Welfare and Development (DSWD) kadagiti bukodda a local government units (LGU) para iti naan-anay a pannakaiwanwan.
No maipapan kadagiti kaso a naipila kontra kadagiti nataengan a nangriribuk, binilin ni Nartatez dagiti imbestigador a makikoordinarda iti opisina ti prosecutor tapno masigurado a maidokumentar amin dagiti maipila a kaso ken ebidensia. (Aaron Recuenco/Manila Bulletin//Lito Hilidon)
