Pattapattaen ti Philippine Atmospheric, Geophysical and Astronomical Services Administration (PAGASA) ita nga aldaw, Septiembre 29, a kumapuyen ti abagat (southwest monsoon) kadagiti umay a lawas, a tanda ti in-inut nga idadateng ti panawen ti amian (northeast monsoon).
Segun iti PAGASA, saanen a direkta nga apektaran ti abagat ti pagilian, idinto a ti easterlies, wenno ti angin manipud iti Pacific Ocean, ti agturay iti sistema ti panawen.
Kuna ni PAGASA weather specialist Munir Baldomero nga adda sumagmamano a banag a masapul a mapaliiw sakbay nga ideklararda ti panaggibus ti abagat.
Sumagmamano kadagitoy ti kaawan ti tudo iti laud a paset ti pagilian, panagsaknap ti easterlies ken northeasterlies wind, ken ti panagkapuy ti angin ti abagatan a laud.
Marcos, Robredo, nagsarak iti Naga city
Ti in-inut a panagbaliw ti paniempo ket mangrugi iti maikadua wenno maikatlo a lawas ti Oktubre ken mabalin nga agpaut agingga iti umuna a lawas ti Nobiembre, segun iti kasasaad ti tangatang.
Gagangay a mangrugi ti panawen ti abagat iti maikadua a lawas ti Mayo wenno apagtapog ti Hunio ket agpaut agingga iti Oktubre, idinto a mangrugi ti amian iti arinunos ti Oktubre wenno apagtapog ti Nobiembre ket agpaut agingga iti Marso. (Ellalyn De Vera-Ruiz/Manila Bulletin//Lito Hilidon/Bannawag)
