Nangipaulog ti maysa a regional trial court ti Mandaluyong City iti arrest warrant kontra ken ni dati a general manager ti Philippine Charity Sweepstakes Office (PCSO) ken dati police colonel a ni Royima Garma ken uppat pay a tattao mainaig iti pannakapapatay ti retirado a heneral a polis a ni Wesley Barayuga idi Hulio 2020, kas impalgak ti Philippine National Police (PNP) ita a Lunes, Septiembre 29.
Kinuna ti pannakangiwat ti PNP a ni Brig. Gen. Randulf Tuaño a sakupen pay ti arrest warrant, nga impaulog ti Branch 279 ti Mandaluyong Regional Trial Court Branch, da retirado a police colonel ken dati a komisioner ti National Police Commission (Napolcom) a ni Edilberto Leonardo; Lt. Col. Santie Fuentes Mendoza, ken dagiti naikkat a polis a da Nelson Enriquez Mariano ken Jeremy Causapin.
Sumangsangoda amin iti kaso a murder ken frustrated murder gapu iti ipapatay ni Barayuga a kameng ti PCSO Board idi napaltogan daytoy lima a tawenen ti napalabas.
Mapukpukaw a nobia, nasarakan iti Pangasinan
Iti hearing iti Kamara idi Septiembre 2024, intudo ni Mendoza da Garma ken Leonardo nga isuda dagiti nangibilin iti pannapapatay ni Barayuga ket pagparangenda a maigapu iti anti-illegal drug operation.
Kinuna ni Mendoza nga awan ti pagpilianna no di ti panangipatungpalna iti naibilin nga aramidenna ta mabuteng iti peggad ti biagna, nangruna ta ammona nga agpada a naimpluensia idi a panawen da Garma, a retirado met la nga opisial ti polisia, ken Leonardo.
Iti met la nasao a hearing, naduktalan nga isagsagana idin ni Barayuga dagiti dokumento tapno maibutaktak ti mapapati a panagkunniber iti PCSO.
Kinuna ni Tuaño nga imbilin ni acting PNP chief Lt. Gen. Jose Melencio Nartatez, Jr. ti pannakaipatungpal ti pammilin ti korte para iti pannakaarestar dagiti akusado.
Kinunana nga addan ni Mendoza kustodia ti Directorate for Personnel and Records Management (DPRM) Personnel Holding and Accounting Unit (PHAU).
Ngem segun ken ni Tuaño, birokenda pay laeng dagiti dadduma pay nga akusado.
Ni met Garma, napan iti Malaysia idi rugrugi daytoy a bulan di nagbayag kalpasan a simmangpet iti pagilian manipud iti US.
Naipadamag nga immanamong ni Garma nga agbalin a saksi kontra ken ni dati a presidente Rodrigo R. Duterte iti sanguanan ti International Criminal Court (ICC).
