Napadayawan dagiti agtutubo a mannaniw iti Ilokano a nangabak iti Salip iti Daniw ti 1st Maestra Merced Pundador Awards (MMPA) iti awarding ceremonies a naangay iti Ilocos Norte Provincial Library iti Siudad ti Laoag idi Septiembre 27, 2025.
Ni Ramae Angely Estrada Mangoba ti Brgy. Hilario, Banna, Ilocos Norte ken agad-adal iti Banna Academy ti nangyalat iti Kapintasan (umuna a gunggona), babaen ti daniwna a "Dinto Agkupas a Pammateg." Immawat iti ₱5,000 ken sertipiko ti pammadayaw, ken naukkoran iti balitok a medalia.
Taga-Brgy. Abaca, Bangui, Ilocos Norte ti napadayawan iti Napimpintas (maika-2 a gunggona), ni Eugene Nacino nga agad-adal iti Bangui National High School, babaen ti daniwna a "Biag a Saanen nga Agbiag." Nagunggunaan iti ₱3,000, sertipiko ti pammadayaw, ken pirak a medalia.
Ti daniw a "Bannawag a Naatap" ni Princess Nicole U. Mabbagu iti Bagot, Dingras, Ilocos Norte ti napili a mapadayawan kas Napintas (maika-3 a gunggona). Immawat iti ₱2,000 ken sertipiko ti pammadayaw, ken naukkoran iti bronse a medalia.
Pasalip ALVIYA iti Sarita 2026, naluktan
Naipaayan met iti Pammadayaw a Gunggona ti daniw ni Bernice Janrylle B. Andres ti Brgy. Parado, Dingras, Ilocos Norte, a napauluan iti "Panagballigi: Biag a Napnuan Arapaap."
Nagpaay a hurado da Elizabeth Madarang-Raquel, pangulo; Djuna Alcantara, ken Linda Lingbaoan, kamkameng.
Imatmatonan ti Pamilia Bermudez-Pascua ti MMPA, babaen ken ni premiado a mannurat Prescillano N. Bermudez, kas pammaregta kadagiti agtutubo ken tumantanor a mannurat nga Ilokano. Nairanta ti salip iti daniw ti 1st MMPA para kadagiti agtutubo, agad-adal ken saan, nga agtawen manipud 12 !agingga iti 18.
Nakibinnulig met ti GUMIL Ilocos Norte, GUMIL Filipinas, ken Bannawag Magazine iti pannakaiwayat ti pasalip. (Delfin P. Dumayas)
