Indagadag ti koalision dagiti civil society group iti International Criminal Court (ICC) a disiplinaenda koma ti abogado ti depensa a ni Nicolas Kaufman gapu iti mapapati a panangiwarasna iti palso nga impormasion mainaig iti kaso ni dati a presidente Rodrigo Duterte a crimes against humanity.
Iti maysa a joint statement, kuna ti koalision a naulit-ulit ti panangballikog ni Kaufman iti kinapudno kadagiti ipilpilana iti ICC tapno mapaboran ti kiddaw ni Duterte nga interim release.
"Yebkasmi ti nakaro a pannakaseknanmi kadagiti maulit-ulit a panangballikog ti abogado ti depensa a ni Nicolas Kaufman, kadagiti sinao dagiti maseknan a partido iti International Criminal Court (ICC)," kuna ti grupo.
Dinakamat ti grupo ti impila ni Kaufman idi Hunio 12 a kinunana sadiay nga inanamongan kanon ti Office of the Prosecutor (OTP) ti interim release ni Duterte segun iti kondision. Ngem iti inlawlawag ti OTP idi agangay a saan a pudno nga inanamonganda ti interim release ni Duterte.
Mapukpukaw a nobia, nasarakan iti Pangasinan
Dinakamat pay ti grupo ti impila ni Kaufman idi Septiembre 26, a binallikogna ti sinao ni Presidential Press Undersecretary Claire Castro nga "ania man ti pangngeddeng ti ICC, akseptaren ti gobierno ti Filipinas."
Segun iti koalision, binalllikog ni Kaufman ti sinao ni Castro ket pinagbalinna a kasla saan a supiaten ti gobierno ti Filipinas ti mosion ti depensa.
Ginutigot ti grupo iti OTP ken iti Office of Public Counsel for Victims nga isaklangda koma ni Kaufman iti ICC gapu iti maulit-ulit a panangballikogna kadagiti kinapudno kadagiti dokumento nga ipilana iti ICC.
Kiniddawda met iti ICC Pre-Trial Chamber ken Presidency a dusaenda koma ni Kaufman gapu iti panangiwarasna iti palso nga impormasion a makadadael iti integridad ken panagtalek ti publiko iti proseso ti ICC.
Pinirmaan dagiti 50 a gunglo ken nalatak a tao ti statement, a pakairamanan ti Philippine Coalition for the International Criminal Court (PCICC), Philippine Alliance of Human Rights Advocates (PAHRA), In Defense of Human Rights and Dignity (iDEFEND), Duterte Panagutin, Center for International Law (Centerlaw), Karapatan, Task Force Detainees of the Philippines (TFD), Hustisya, ken Rise Up for Life and for Rights, agraman da Cardinal Pablo Virgilio David, Rep. Leila M. De Lima, ken human rights lawyer Antonio La Viña. (Jel Santos/Manila Bulletin//Lito Hilidon/Bannawag)
