Dinagadag ni Sekretario ti Presidential Communications Office (PCO) Dave Gomez dagiti mammanday-linteg a pagbalinendan a linteg ti Freedom of Information (FOI) bill iti baet dagiti ikkis iti transparensia ken panangsungbat kadagiti anomalia dagiti flood control project.
Daytoy ti impalgak ni Gomez iti panagbitlana iti panaglukat ti Global Conference of the International Day for Universal Access to Information (IDUAI) 2025 a naangay iti Siudad ti Pasay.
"Alaek daytoy a gundaway a mangdagadag kadagiti mammanday-linteg, daulo ti civil society, ken padak a public servant nga agmaymaysatayo para iti pannakaipaulog ti Right to Information Bill para iti Filipinas, a mangitandudo iti sangalubongan a pagalagadan ken mangpapigsa iti demokrasiatayo," kuna ni Gomez.
Segun ken ni Gomez, siam a tawenen nga agtrabtrabaho ti PCO iti pannakaipasdek ti FOI Program babaen ti FOI Program Management Office, a mangimatmaton iti eFOI portal, panangisaknap iti programa kadagiti lokal, ken panangyusuat iti capacity-building programs iti entero a pagilian, agraman panangsaranget iti misinformation ken disinformation babaen dagiti mapagtalkan a datos a para iti publiko.
Mapukpukaw a nobia, nasarakan iti Pangasinan
Ti Filipinas ti umuna a pagilian iti Southeast Asia a nangsangaili iti Global Conference of the International Day for Universal Access to Information (IDUAI). (Betheena Unite/Manila Bulletin//Lito Hilidon/Bannawag)
