Ikarigatan ti Kamara, babaen ti panangidaulo ni Speaker Faustino “Bojie” Dy III, a leppasen ti plenary debate maipanggep iti ₱6.793 a trilion a General Appropriations Bill (GAB) wenno ti singasing a nailian a badiet para iti 2026, itoy a lawas.
Inlatang ti Kamara ti Oktubre 10 para iti pannakaamendar ti 2026 GAB, a naipila kas House Bill (HB) No. 4058.
Rinugian ita nga aldaw, Septiembre 29, ti Committee on Appropriations, a mangidadaulo iti panagdedebate iti plenario, a tamingen ti singasing a badiet ti Department of Trade and Industry (DTI), Department of Agriculture (DA), Department of Health (DOH), ken ti Department of Public Works and Highways (DPWH), ken dadduma pay nga opisina ti ehekutibo.
Tamingenda inton Septiembre 30 dagiti pondo ti Office of the Vice President (OVP), Department of Social Welfare and Development (DSWD), Department of Migrant Workers (DMW), Department of Information and Communications Technology (DICT), Department of Labor and Employment (DOLE), Department of Interior and Local Government (DILG), Civil Service Commission (CSC), Career Executive Service Board (CESB), ken dadduma pay.
Retirado a heneral, nakemmeg gapu iti panangsugsog a mangtippuog iti gobierno
Inton Oktubre 1, idatag ni Nueva Ecija 1st district Rep. Mikaela "Mika" Suansing ti badiet ti Office of the President (OP) ken dadduma pay nga opisina ti ehekutibo, ti Department of Foreign Affairs (DFA), Department of Science and Technology (DOST), ken Department of Transportation (DoTr).
Apaman a maaprobaran ti GAB iti Kamara, mayallatiw daytoy iti Senado tapno tingitingenda. (Ellson Quismorio/Manila Bulletin//Lito Hilidon/Bannawag)
