Impaulog ti Commission on Elections (Comelec) idi Martes, Septiembre 30, ti Certificate of Finality and Entry of Judgment, iti pannakadiskualipikar ti grupo a Duty to Energize the Republic through the Enlightenment of the Youth Sectoral Party List Organization, wenno am-ammo a kas Duterte Youth Partylist.
Iti resolusion nga inruar ti Commission En Banc, pinatalgedanda ti pangngeddeng ti Comelec Second Division a nangideklarar iti rehistrasion ti Duterte Youth Partylist a kas "void ab initio" wenno awan pategna manipud iti rugi, gapu iti saanda a pannakatungpal iti kasapulan a pannakaipablaak ken hearing, a hurisdiksion ti Comelec.
Natakuatan pay ti Comelec dagiti sumaganad a makagapu iti pannakawaswas ti rehistrasionda:
* Saan a napudno nga ibagbagada iti petision, kangrunaan ti eligibility dagiti nominee-da.
Kasapulan ti natibker ken nainkalintegan a pagtaktakderan iti parikut iti WPS --NMC
* Awan ti nasayaat a panggep a mangibagi iti sektor a nakaipilaan ti petition ket ngarud, lapdanna ti napudno a panangikeddeng iti pudno a pagayatan ti elektorado;
* Nangitandudo iti kinaranggas ken saan a nainkalintegan a wagas tapno maalada ti kayatda;
* Maysa a gunglo a ponduan ken tultulongan ti National Youth Commission;
* Manglabsing wenno saan a pannakaipatungpal ti linteg wenno pagalagadan mainaig iti eleksion; ken
* Naipila ti petision tapno mangriribuk ken manglilibeg iti proseso ti eleksion.
Gapu iti daytoy, maipatungpalen a dagus ti pannakawaswas ti rehistrasion ti Duterte Youth a kas maysa a party-list. (Ferdinand Patinio/PNA//Lito Hilidon//Bannawag)
