Nakagun-od ni Presidente Ferdinand Marcos Jr. iti nangato a net satisfaction rating a +10 idi Hunio, a 20 a puntos ti ngimmatuanna manipud iti grado a -10 idi Abril, segun iti surbey nga insayangkat ti Social Weather Stations (SWS) a naipalgak idi Septiembre 30.
Maibasar iti surbey a naiwayat manipud Hunio 25 agingga 29, adda 46 a porsiento dagiti nataengan a Filipino ti mapnek (satisfied) iti nagapuanan ti Presidente, 19 a porsiento ti saan a nakadesision, ken 36 a porsiento dagiti saan a napnek (dissatisfied).
Ti dagup a +10 a net satisfaction rating ti ibilang ti SWS a kalalainganna (moderate) laeng a grado (+10 agingga +29).
Ti kaudian a grado ni Presidente Marcos ti maysa a dakkel ti nagbaliwanna manipud iti saan a nasayaat ("poor") a -10 idi Abril, kalpasan a nagpababa manipud iti +32 (very good) idi Septiembre 2024 ket nagbalin a +1 (neutral) idi Pebrero 2025.
Kasapulan ti natibker ken nainkalintegan a pagtaktakderan iti parikut iti WPS --NMC
Ipakita ti surbey a ngimmato ti satisfaction rating ti presidente kadagiti amin a lugar, a kangatuan iti Mindanao, a nakaalanna iti 35 a puntos manipud iti -44 idi Abril ken -9 idi Hunio.
Ngimmato met ti gradona kadagiti dadduma pay a rehion, kas iti Balance Luzon (21 a puntos manipud iti +1), sumaruno iti Visayas (siam a puntos manipud iti -11), ken iti Metro Manila (pito a puntos manipud iti -6).
Naaramid ti surbey babaen ti rupanrupa nga interbiu kadagiti 1,200 a respondent iti entero a pagilian, a naguduadua iti Metro Manila, Balance Luzon, ti Visayas, ken Mindanao. (Ellalyn De Vera-Ruiz/Manila Bulletin//Lito Hilidon/Bannawag)
