Inlawlawag ni Senate President Pro Tempore Panfilo "Ping" Lacson ita nga aldaw, Oktubre 1, ti retrato nga agwarwaras iti internet, a kaduana dagiti agassawa a Curlee ken Sara Discaya ken ti anak dagitoy.
Ni Cavite 4th district Rep. Francisco "Kiko" Barzaga ti nangipaskil iti nakuna a retrato iti Facebook, ket kunana a masapul nga imbestigaren ti kinapudno ti ladawan ni Sen. Lacson a kaduana dagiti Discaya iti pribado a taripnong.
Segun ken ni Lacson, naala ti ladawan iti maudi a lawas ti Abril, iti arinunos ti 90-aldaw a panagkakampania para iti 2025 midterm elections. Ni Fred Villaroman a taga-Davao City ti nangyeg iti anak dagiti Discaya iti opisinana iti Taguig City. Simmaruno nga immay dagiti agassawa a Discaya kalpasanna.
Nagserbi ti ama ni Fred a ni Police Brig. Gen. Francisco Villaroman ken ni Lacson idi nagpaay daytoy a taona iti Philippine National Police ken nagbalin a hepe ti security detail ni dati a Mayor Rodrigo Duterte.
Senado, pinasingkedanna ti ₱6.793-trilion a nailian a badiet para 2026
Kuna ni Lacson a ti anak da Curlee ken Sara a ni Pacifico Felizario Discaya II a nominee ti party-list group nga Ako Pinoy (wenno Ako'y Pinoy) ti nangawis kenkuana a tumabuno iti maysa a grand rally iti maysa a probinsia ti Davao.
Kuna ni Lacson a nagkedked isuna iti awis dagiti Discaya, kas panangraem iti gayyemna a ni Senate President Vicente "Tito" Sotto III, ta ti kaanakanna a ni Pasig City Mayor Vico Sotto ket kabinnalubal ni Sara Discaya (a kandidato a para mayor), ken gapu ta adda pay dadduma a party-list group ti mangiraman iti naganna iti sample ballot.
"Diak am-ammo dagiti Discaya ken daydiay laeng ti umuna ken maudi a gundaway a pannakakitak kadakuada, malaksid kadagiti hearing ti Blue Ribbon committee," kuna ni Lacson, ket innayonna a 15 agingga 20 a minuto laeng ti panagsaritada ket nagleppas daytoy iti panagparetratoda.
Inanamaen ni Lacson nga umdas daytoy a pangilawlawagna iti ania man a dakes a panangipapan nga ikabilda iti dayta a retrato. (Dhel Nazario/Manila Bulletin//Lito Hilidon/Bannawag)
