Inlibak ni Partido Demokratiko Pilipino (PDP) deputy spokesperson Atty. Ferdinand Topacio, idi Septiembre 30, ti ania man a pannakairamanna--kasta met dagiti opisial PDP-National Capital Region ken ni dati a Manila City Administrator Bernie Ang--iti napataud a riribuk iti rali iti Manila idi Septiembre 21.
Dinagadag ni Topacio dagiti autoridad nga ipamaysada ketdi ti atensionda kadagiti tao a nagpiansa ken nangipaay iti suporta kadagiti nakemmeg a suspek.
Iti naangay a Balitaan News Forum ti Manila City Hall Reporters’ Association (MACHRA), kinuna ni Topacio a pinakaammuanna dagiti grupo a nakaabungot iti nangisit a nagtagipang-or ken nakaabaday iti bag a magmagna iti likudan ti grupoda.
Kuna ni Topacio a pinasardengna ti grupo nga idadauluanna, a buklen dagiti estudiante ken empleado, tapno palabsenda ti mapagduaduaan a grupo.
Senado, pinasingkedanna ti ₱6.793-trilion a nailian a badiet para 2026
Dinakamat ni Topacio ti kinuna dagiti polis idi a dagiti naranggas a grupo ket inimpluensiaan dagiti elemento dagiti rebelde.
Kuna ni Topacio a dagiti nalatak a personalidad nga addaan pakainaigan kadagiti progresibo a grupo kas iti Gabriela, Kabataan, ken Akbayan ti mangsupsuportar kadagiti nakemmeg a ralista ken nangkiddaw iti pannakawayawayada.
Imballaag ni Topacio a politika ti motibo dagiti manginaig kadagiti kameng ti PDP iti napasamak a riribuk, ket saanen a masdaaw no agimbento iti ebidensia dagiti kalabanda. (Diann Calucin/Manila Bulletin//Lito Hilidon/Bannawag)
