Rinugianen dagiti abogado ni Senador Jose "Jinggoy" P. Estrada ita nga aldaw, Oktubre 2, ti mangiparang kadagiti ebidensia para iti 11 a kasona a graft a naidatag iti Sandiganbayan mainaig iti mapapati a di umisu a pannakausar ti ₱183.7 a milion a priority development assistance fund (PDAF) idi 2004.
Ti kaso a graft ket ti panangusar ti maysa nga opisial ti gobierno wenno politiko iti akem wenno impluensiana tapno makaganansiar wenno para iti bukodna a pagimbagan.
Idi Marso 26 itoy a tawen, saan a pinatgan ti Sandiganbayan ti demurrer to evidence (wenno ti mosion a mangwaswas iti kaso gapu iti nakapuy nga ebidensia) nga impila dagiti abogado ni Estrada. Daytoy ti gapuna a nangipila ni Estrada iti motion for reconsideration, ngem saan met laeng a pinatgan ti Sandiganbayan daytoy.
Iti motion for reconsideration ni Estrada, kunana a saan nga inkankano ti Sandiganbayan dagiti napudno ken legal a natakuatanda iti kasona a plunder, a nakaabsueltuanna.
Marcos, Robredo, nagsarak iti Naga city
Segun ken ni Estrada, awan ti pammaneknek nga adda ammona iti wagas iti pannakaaramid ti krimen, ken nakiuman ken nakisarita isuna kadagiti dadduma pay a naakusaran a nairaman kadagiti PDAF project.
Ngem inlawlawag ti Sandiganbayan iti pangngeddengda a dagiti natakuatan ken konklusion iti kasona a plunder ket saan a mangitunda iti giddato a pannakawaswas metten dagiti kasona a graft.
Patien ketdi ti korte a naiparang ti prosekusion ti umdas ken natibker nga ebidensia a mangipasdek iti prima facie a kaso kontra kenkuana a mangitunda iti pannakasentensiana.
Gapu iti daytoy, inikkan ti Sandiganbayan ni Estrada iti gundawayna a mangiparang ken mangsupiat kadagiti ebidensia nga imparang ti prosekusion. (Czarina Nicole Ong Ki/Manila Bulletin//Lito Hilidon/Bannawag)
